INCHI 18 LEKIN VANRAM I HLOH THEI

_Tihnghin rual loh_

*INCHI 18 LEKIN VANRAM I HLOH THEI*

By Rick Warren 

— Nov 06, 2024

“Chu chu ṭhenkhatten nei emaw intiin rinna kawng chu an kal kawisan ta a.” 1 Timothea 6:21

I lu leh i lung chu inchi 18 chauhva inhlat a ni. Vanduaithlak takin mi ṭhenkhat chuan inchi 18 lekin vanram an hloh dawn. An lu chauhvin an hriaa an thinlunga Pathian an hriat loh avangin. An rilru chuan chanchin ṭha chu an pawm a, an thinlung an thlak danglam thei si lo a ni.

Sikul kha ka kai rei khawp mai a — master leh doctorate degree te chhiar tel vek phei chuan kum 24 lai a ni. Dik taka sawi chuan, kan thil zirte kha a tam zawk chu ka hre tawh lo a ni.

Nimahsela thil pawimawh ber ka theihnghilh loh a awm: Pathian siam kan ni tih leh Pathian tana siam kan ni tih hi. Chu chu kan hriat phawt loh chuan kan nun hian awmzia a nei lo vang.

Nangma tana nung tura siam i ni lo.

Bible chuan, “Chu chu ṭhenkhatten nei emaw intiin rinna kawng chu an kal kawisan ta a.” (1 Timothea 6:21).

Finna leh zir thiamna ril tak tak te zir thiam mah la. Pathian i hriat loh chuan, i damchhan i hre lo tihna a ni.

I nun tawp lamah Pathian fiahna i paltlang dawn. Hei hi chanchin ṭha a ni. Chu fiahna chhanna chu Bible-ah a awm vek a, Bible hmangin en chungin i chhang thei ang.

Chu fiahnaah chuan, Pathian chuan tlang takin a zawt dawn che a. I hnaa i chet ṭhat leh ṭhat loh te a zawt dawn lo che a. I bank account-a pawisa awmzat pawh a zawt dawn lo che. 

Chu aia a zawh tur che chu hei hi a ni: Min hria em tih hi? Ka Fapa krawsa i tana thi nen khan inlaichinna in nei em?

Vawiinah hian i rilru leh thinlung chuan thil pawimawh ber leh thutak Isua chu a hriat theih nan thutlukna siam turin inbuatsaih rawh le.

Tichuan ruahmanna siam la. Pathian hriatna chu tihpalh thil thua lo thleng a ni lo. Pathian Thu zirchianna aṭanga lo thleng tura nghah ngawt pawh a ni lo. Chutianga hun remchang a awm huna lo thleng tura i ngaih ngawt avang chuan a lo thleng lo vang!

Chung ai chuan, Pathian tan hun insiam rawh. Thil dang zawng aiin amah chu hriat i duh a ni tih lantirin dah pawimawh hmasa rawh. Thil dang chu ṭha hle pawh ni se "aih" ti la. Thil pawimawh ber atan i hun i pe thei ang.

Ngaihtuah zui atan

* Pathian i hriatna aṭang chuan Pathiana innghat tura ke penna tur chu engin nge dal che?

* Kristian i nih hnu hian Pathianin engvangin nge hriat a duh che nia i hriat?

* “Ka Fapa i hria em?” tiin Pathianin zawt ta che sela engtin nge i chhan ang?

*[Lettu: Sangpuia]*