Hualtu kum 400 tlin lawm; Hmarcha lei duh pawh tih fel thawkhat a ni tawh a, thlai dangte pawh sorkar lamin a leitu tur leh a hralhna tur a buaipui mek

Serchhip | November 28, 2024: Vawiin khan Hualtu khua chuan an khaw kum 400 tlin lawmna leh Hualtu Branch YMA Golden Jubillee lawmna, Alu Hmun Field, Hualtungamtawna Run-ah neih a ni a, he hunah hi Home Minister Pu K Sapdanga leh Pu PC Vanlalruata Agriculture Minister ten an hmanpui a, Hualtu khua kum 400 tlin lawmna Lungphun Home Minister chuan a hawng nghal bawk.

Home Minister Pu K Sapdanga chuan, " Sorkarin kan buaipui ber chu kan flagship programe Bana kaih/Handholding/Thlai thar lei hi a ni a. Kum tamtak kaltaah khan Hualtu khua hi khaw intodelh in lo ni tawh a, buh leh thlaiah te khaw dang ngai lova intodelh thei in ni. Sorkar policy tihlawhtlingtu tur khua inni a, sorkar in thlai thar a thlan chhuah bik Hmarcha leh Sawhthing phei chu in hlawkpui ngei ka beisei" a ti. Home Minister chuan, "Tunah hian Hmarcha lei duh pawh tih fel thawkhat a ni tawha, thlai dangte pawh sorkar lamin a leitu tur leh a hralhna tur a buaipui mek a, Handholding Policy leh CM special package hmangin kuminah bul kan han ṭana, kuthnathawktute huan lo ram thleng phak tanpuina inhmuh ngei ka beisei a, chu chu ZPM sorkar pawhin a tum ber a ni", a ti.

Pu PC Vanlalruata, Agriculture Minister pawhin thusawiin, "Ka bial chhunga khaw ropui tak mai leh upa tak mai Hualtu khua hi vawiin thlengin khaw chhuanawm kan la ni renga, Zikhlum leh Tomato ah Aizawl khawpui inchawm meka, khaw taima tak lo ni zel turin ka chah duh che u a ni. Mizorama mi hmingtha tak takte pawh he khua atang hian inlo chhuak tawha, zirna kawngahte, kuthnathawh kawngahte, infiamna kawngah te ṭan la zual sauh sauh ang che u", a ti bawk.

Home Minister Pu K Sapdanga leh Pu PC Vanlalruata Agriculture Minister te hian Hualtu khua hmasawnna tur mamawh hrang hrangte an en bawk.