"Mizoram sawrkar pawh kan unaute tuamhlawm leh thlavang hauh kawngah huaisen takin pen zel tur leh tun hmaa an sawi thin anga hnam thinlung pu thar leh turin kan phut," - MNF
Aizawl | November 28, 2024: MNF Media chuan vawiin khan Press Conf kovin, Manipur CM a bang ngam tur a ni' Central Sorkar pawh hian a mawhphurhna hlen rawh se," an ti a.
"Mizoram sawrkar pawh kan unaute tuamhlawm leh thlavang hauh kawngah huaisen takin pen zel tur leh tun hmaa an sawi thin anga hnam thinlung pu thar leh turin kan phut," an ti bawk.
"Manipur Sawrkar, Chief Minister Biren Singh a kaihhruaiin a tih tur a tih loh vang leh a tih loh tur a tih avanga an state chhunga buaina nasa tak chhuak chu chinfel ni thuai ni se kan duh a, hemi avanga kan unaute tawrhna zozai hi a tam ta mah mahin kan hria a. Manipur tualchhung buaina chingfel zawnga hmalakna hmuh tur a awm loh lai a, buaina tizual tur zawnga hleih nei taka thuneihna hmang chhunzawm zel theia ala awm hi tha kan ti lo. Chuvangin, an Chief Minister Biren Singh chu bang ngam turin kan ngen a, he buaina avanga pawisawi lote tawrhna kal zel hi titawp thuai turin Central sawrkar pawh kan phut a ni. Manipura chengten zalen taka rorelna dik hnuaia an chanvo diktak an neih leh thuai hi thil tul tawpkhawk a ni."
"Ni 22.11.2024 thleng khan Biren Singh-a kaihhruai Manipur sorkar rorelna hnuaiah tualchhung buaina avangin kan unaute zingah nunna chan 219 awm tawhin, thisen tam tak luang mekin, hliam tuar sang tam tak an awm mek a. Kristiante Biak in 360 chuang tibawrhban leh halral a ni a, chenna In 7,000 chuang meivapah chantir a ni tawh a, khaw 200 chuang hal a ni tawh bawk. Heng bakah hian khua atanga umchhuah, sa himna zawnga mahni in leh lo tlansan mi 41,425 chuang an awm mek bawk. Heng chhiatna leh buaina thleng zawng zawngah hian Manipur state a hotu lu ber hian mawh a phur niin kan ngai."
"Democracy ram lian bera chhal India ram chhunga nunrawnna leh pawikhawihna, sakhaw hmun thianghlim tihbawrhbanna nen lama khuahkhirh miahlo a a thleng chhunzawm zel hi khawvel hriatah pawh a zahthlak hle a ni. Hetia Mipui thlan sorkarin mipui chunga tawrhna thleng a en liam mek hi Democracy laka helna a ni."
"Manipura kan unaute tawrhna hi kan tawrhna a nih tlat avangin an tan nghet taka ding zelin, MNF chuan a maimitchhin san ngai dawn lo a ni. MNF kaihhruai sawrkar kal ta, Chief Minister huaisen tak, Pu Zoramthanga hruaina hnuaiah khan kan unaute thlavang hauh kawngah na takin ke pen a ni tawh a, Manipur, Myanmar leh Bangladesh atanga sahimna zawnga rawn tlanchuuak te pawh ei leh in, chenna leh zirna thlengin alo tuamhlawm tawh a. Central sawrkar duhdan kalh rap rapa chet pawh alo ni tawh a ni. Tunhnai maiah pawh MNF Sr. Vice President hovin MNF MLA 2 nen Manipur thlengin an thlavang hauhin thawh chhuah alo ni tawh bawk."
Mahni hnampuite nunna humhim tur leh mahni ram chhan tura kan unauten an beihna kawngah inpumkhat leh lungrual taka thawk ho a, Zo nunmawi a taka lantir zel turin kan duh a. Zofate hnama min dintu kan Pathian rawn chunga huaisen taka pen zel turin kan beisei a. Zoram mipui pawh in tan kan tih theih tawkah theihtawp chhuah a, unau inthen hrang theilo kan nihna lantir zel turin kan inngen in, kan sawm tak meuh bawk a ni.
Rorelna fello avanga buaina tam tak thleng zel chungchang huaisen taka India ram rorelna sang bera auchhuah pui a, tlang tak a, Parliamentary Meeting ah pawh sawi chhuak ngam thin Mizoram MP(Rajya Sabha) Pu K. Vanlalvena kan nei hi a lawmawm kan ti a, Zofate tan hetiang hruaitu kan nei hi chhuanawm kan ti takzet.
Manipur, Myanmar leh Bangladesh tualchhung buaina avanga sa himna zawnga Mizoram a lo lut kan unaute lo buaipui kawngah Kohhran te, Tlawmngai pawl hrang hrang te leh Zirlai pawlte inpekna a ropui hle a. An chenna tur leh ei leh in tur lo buaipuitu khaw hrang hranga khawtlang hruaitute leh mipuite inpekna leh hmangaihna lanchhuah tir a ni hi fakawm kan ti takzet a. Zofate kan inunauna ngheh zia a langin kan hria. Kan inlungrualna leh inhmangaihna hi i vawng nung zel ang u. Chutihlaiin, kan unau sahimna zawnga Mizorama khawsa mekte pawh an awmna khawtlang duhdante ngai pawimawh tur leh ram dan te zah a, mi dangte tana hnawksak ni lo tur leh khawtlang leh kohhrana mi tangkai ni vek turin kan chah bawk.
Mizoram sawrkar pawh kan unau, inhumhimna zawnga Mizorama awm mekte tuamhlawm kawngah leh Manipura kan unaute thlavang hauh kawngah huaisen takin pen zel tur leh tun hmaa an sawi thin anga hnam thinlung pu thar leh turin kan phut a. Ram leh hnam tana hma an lakna kawngah chuan theihtawpa tawiawm kan inhuam reng a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: