HMEITHAI CHAKLO ZAWK CHUNGA SAWRKAR CHETNA HI KAN DEM TAKZET

Aizawl | NOv 20, 2024: Nimin ni 19, November 2024(Thawhtanni) a National Highway laih hna kal mekah Seling khawchhunga a paltlang tur ram neitu, hmeithai Pi Lalhmangaihi In ding lai, JCB hmanga nawrchhiat sak a ni kha Mizo National Women Front chuan kan dem takzet a. Dan chunga leng ang maia hleilen a, chaklo zawkte nekchep leh diriam a ni hi a pawi kan tiin, kan tawrhpui takzet a ni.

Kawngpui sial hna kal mekah a hna thawktu NHIDCL hnen atangin Zangnadawmna a dawn tur ang pawh la dawnglo, an khua Seling mipui leh khawtlang hruaitute pawh hrilhlawkna awmlo a, Aizawl Addl. DC kaihhruaina hnuaia thuneihna leka rikrap a ni hi thil rapthlak tak, Mizoram a thlengnawn tawhlo tur atan kan duh takzet a ni. Hmeithai harsa zawkte chhawmdawltu tur Sawrkar rikrapna hnuaia, mittui tlazawih zawih leh awrawl tawpa Pi Lalhmangaihi tana ṭahna thlen a ni hi kan thinlung a na takzet a ni.

Hmeithai rethei leh puih ngai zawk tana Seling mipui, khawtlang hruaitute leh Centre for Environment and Social Justice(CESJ), Mizoram ten an hmalakna hi kan thlawp tlat a, a hlawhtlinna thleng ngei se, a tuartute tawrhna tuam damtu ni ngei turin hmalatute duhsakna kan hlan bawk a ni.

Sd/-

(K. LALNUNHELI)

General Secretary

Mizo National Women Front

General Headquarters

Aizawl, Mizoram

20.11.2024