Zai lama beidawng hman lek lek Youth Icon 2024 Taitea Pautu

Aizawl | October 29, 2024: LBS Suzuki Youth Icon 2024 chu tluang takin thlan zawh a lo ni ta a, LBS Suzuki Youth Icon 2024 atan Bawktlang tlangval, Salem Venga cheng mek Lalsangliana (Taitea Pautu) thlan a ni. Taitea Pautu hi Nimin October 28 kha a piancham a ni nghe nghe.

Youth Icon 2024 Taitea Pautu hian, Zai intihsiakna hrang hrangah a lo tel nual tawh a, a thlen san lo vangin a beidawng hman lek lek tih a sawi a. "tun tum Icon hi a tawpna ber atan tiin ka rawn tel a. . . thleng sang lo pawh ni ila intihsiakna danga tel ka tum tawh lo!," a ti bawk.

Pathian lo ropui ber rawh se. Keima lam thlîr lovin chung lam thil tih hi min thlîrpui zawk ang che u. Thingtlâng kilkhâwra piang leh seilian, ka nuna chhuan tûr nei chuang bîk si lo heti tak maia min chawimâwi hi, "Kei hi eng nge maw ka niha min hriat reng ṭhin ni?." - Taitea Pautu

View this post on Instagram

A post shared by Lalsangliana (@taitea_pautu)

Beidawng hman lek lek Bawktlang Tlangval Lalsangliana hi lo beidawng ta se, thalai tam takin a awmna pawh an hriat ngai loh Bawktlang khua hian tun ang hian hriat hlawhin, hmeichhe tam tak ngaihven a hlawh kher lo mai thei!

Mahse, a beidawng lova, a beih tang tangna zarah, Serchhip district chhunga khaw lian lo tak Bawktlang hi tunlaia hmeichhe tam tak kal chakna a ni ta a ni.

Bawktlang khua hi Aizawl atangin KM 150 vel a hla a ni a, Serchhip district chhung, East Lungdar RD Block chhunga awm a ni a, India Chhiarpui 2011 khan in 64 awmin, mihring 319 an cheng a, heng zinga 153 hi mipa niin, hmeichhia hi 166 an ni. Bawktlang khua-ah hian Sorkar enkawl Primary School leh Middle School pakhat ve ve a awm a. Middle School an zawh tawh chuan, zir zawm turin an khua atanga khaw hnai ber N Vanlaiphai pan a ngai a ni.

Youth Icon a tel dan leh a rilru puthmang te sawiin Youth Icon 2024 Taitea Pautu chuan, "ka beidawng ve lek lek a, intihsiakna ka tel tawhnaah ka thleng sang ngai si lova, Zai hi ka kawng a ni dawn lo ni ang, tih rilru ka pu lek lek," a ti a. "tun tum Icon hi a tawpna ber atan tiin ka rawn tel leh a. Tun tumah hian thleng sang lo pawh ni ila intihsiakna danga tel ka tum tawh lo!," tiin Youth Icon 2024 a tel dan a sawi.

Youth Icon 2024 Taitea Pautu hian, Zai intihsiakna hrang hrangah a lo tel nual tawh a, a thlen san lo vangin a beidawng hman lek lek tih a sawi a. Kum 2019 khan LPS Vision buatsaih Youth Icon 2019-ah lo tel tawhin, Audition round a paltlang lo. 2020-ah YK Solar buatsaih Vanlalsailova hla hmanga online-a inzaisiak-ah a tel a. MYC Perhkhuang-ah tel lehin, a thleng sang lo. Kum 2022 khan ZONET Cable TV buatsaih Mizo Idol-ah a tel leh a, Top 50 a thleng lo. Kum 2022 vek khan Zoram Thar Zofate Lairelna Inpui buatsaih Zofa Lelte-ah a tel leh a, Top 30 a thleng a, top 10 a thleng zo lo!

Taitea Pautu chuan, "chhungkaw rethei deuh kan ni thin a, pukchawp tak meuh meuhin kan khawsa a, he dinhmun ka thleng hi ropui ka ti," a ti bawk.

Youth Icon 2024 Taitea Pautu nu hi Vanramngaii niin, a pa hi Vanlaldika a ni a, an unau hi panga niin, mipa pathum leh hmeichhe pahnih an ni. Taitea hi unau zinga naupang ber dawttu a ni.

Youth Icon 2024 Taitea hian, "tlaia Volleyball khelh a thlan zawk avangin College a kal lai hian a zai ngai lo! tih a sawi a, Music Society-ah pawh a tel loh thu LPS Most Wanted Program-a an kawmnaah a sawi.

Aizawl District Volleyball Association hnuaiah Second Division club-ah a khel a, Champhai district-ah erawh 1st Division club-ah a khel tawh bawk. Infiam lama tui a nih vang hian an khua-ah chuan Volleyball-ah captain te a lo ni tawh thin.

Taitea Pautu hi a nu leh pa pawh zaithiam tak an ni a, a pa phei chu an tlangval laiin band te lo indin tawh thin a ni a, a pa hian solfa a thiam a, zaipawl conductor te a lo ni thin a. Amah pawh hi Zaipawl-ah Asst. Conductor a ni mek bawk a ni.

Taitea Pautu hi kum 15 a nih atangin YMA Day-ah mipui hmaah zai tanin, 'Ni tin Lalpa' tih hla a sa a ni.

Zirna lamah chuan, Middle School thleng an khua Bawktlangah a zir a, Pawl 10 leh 12 hi - N Vanlaiphai atangin a zo leh a, Kum 18 a nih atangin Aizawl-ah awmin, Govt T Romana College-ah a kal a, B.A (Political) a la a ni.

Photo: Pipia