| Sumdawng lirtheite October 23-ah nawrh tlang tum; Mipui chhawk zangkhai turin MST Bus tlan dawn!

Aizawl | October 22, 2024: Sumdawng lirtheite October 23-ah nawrh tlang tum; Nuar lo turin Home Minister-in ngen.

Mipui mamawhna chhawk zangkhai turin MST Bus tlan dawn!

Mizoram Commercial Vehicle Union (MCVU) chuan vawiin khan Aizawl Press Club-ah thuthar thehdarhtute kawmin, naktuk October 23-a Tuialhthei man tihhniam phuta lungawi lohna lantir an tum chu kaltlangpui an tum thu an sawi.

Hetihlai hian, Home Minister K Sapdanga chuan, MCVU te tlan lova nawrh an puan chu sut leh turin a ngen nawn leh a. An nuar lui a nih pawhin, transport association dang thlawp tum lo an pung zel a, tun thleng hian heng pawl pariat-in mipui tana harsatna siam duh ve loin nawrh ve loh an tum, niin a tarlang.

MCVU te an nuar tlang a nih chuan, Aizawl khawpuiah Taxi te intlanchhawk awm lovon an tlan tir dawn a. MST Bus te pawh tlan tir an nih tur thu tarlan a ni bawk.

MIZORAM COMMERCIAL VEHICLE UNION

PRESS STATEMENT

Mizoram Commercial Vehicle Union (MCVU)-in oil man sang leh kawng chhe nasa lutuk avanga loh theih loh a lungawi lohna kan lantirin Dt.23.10.2024 hian service lovin kan ding dawn a, YMA rorel inkhawmpui a awm dawn avang leh Kohhran Inkhawmpui programme te a lo awm avangin ni khat din ni se kan ti a. Hetianga lungawi lohna lantir a ngai tur hi a pawi kan ti hle a, lungawi lohna kan lantir tur chhan hi Zoram mipui hriatah puan a tulin kan hria a, a thehdarh kawngah theihtawpa min tanpui turin Chanchinbu mite kan ngen che u a ni.

1. Kawng chhia: Mitinin kan hriat angina Mizoram pumah inkalpawhna kawng a chhe em em vek a, Aizawl khaw chhung pawh a chhiat ber tum tih hial a ni. Phai atanga kan chak lakna kawngpui tlan hleih theih loh khawpin a chhia a. Tin, Mizoram chhunga inkalpawhna kawng a chhe em em vek a, kan lirtheiin a tuara, a tuartu ber chu mipui an ni. Ruahtui tlak tam vang chu ni pakhat mah se sorkar inthlahdah vang niin kan hria a, kan lungawi lo a ni.

2. Oil man sang leh chhiah: Mizoram sorkar chuan petrol leh diesel man tipungin chhiah a la ta a, a punna hi petrol-ah Rs.5.56 niin diesel-ah Rs.7.76-in a pung ta a ni. Chhiah lak leh oil man tihpun hi kan do lo va, amaherawhchu vawi leh khata a pung vak mai hi kan hrethiam lo va, thil man zawng zawng a tihto tur leh mipuia a nghawng turte thlirin, Chief Minister pawh vawi thum lai kan hmu a ni. Central YMA telna NGO Coordination Committee-in diesel leh petrol man hi Rs.3.00 ve vea dil hniam theih an inrin avang leh, an thu leh hla ngaichang tura min ngen avangin kan hun tiam kan tawlh ta zawk a ni.

3. A hun kan ti lo: Mizoram pumah kawng a chhia a, lirtheia eizawngtute min nghawng na em em a, kawng chhiaah kan motor a tangin a tlu a, inhnuhchhuah nan leh motor chhe siam nan cheng tam tak kan seng a, lirthei tam tak phei chu hmun tam takah an service thei lo hial a ni. Chutiang dinhmun harsaa kan din mek laia sorkarin oil man a tisang vak mai hi a hun kan ti lo a ni.

4. Mipuite kan ngenna: Oil man to hian lirtheia eizawngte chauh a nghawng lo va, chhungkaw tin min nghawng a ni. Oil man a to chuan bungraw phurh man a sang lo thei lo va, in sakna bungrua leh ei leh bar phurh man a sang dawn. Hemi ngaihtuah chunga lungawi lohna lantir kan ni tih min hriatpui a, min thlawp turin mipuite kan ngen a ni.

NUAR LO TURIN NGEN NAWN AN NI.

Mizoram Commercial Vehicle Union-ten Oct 23/2024 atanga tlan lova nawrh an puan chu sut leh turin kan ngen nawn leh. An nuar lui a nih pawhin, transport association dang thlawp tum lo an pung zel a, tun thleng hian heng pawl pariat-te hian mipui tana harsatna siam duh ve loin nawrh ve loh an tum:

1. All Mizoram Petroleum Dealers Association.

2. Mizoram Taxi Association

3. Petroleum Entrepreneur & Transporter Union Mizoram

4. Mizoram Truck Driver Association

5. Mizoram Oil Tanker Driver Association

6. Mizoram Indane Driver Welfare

7. All Mizoram Commercial Tripper Association ( Owners & Drivers)

8. Champhai District Auto Rickshaw Owners Association.

Transport deptt hotu te leh Police department hotute vawiina Home Minister hova meeting chuan MCVU nawrh hi an thulh lo a nih pawhin mipui nunphung a kaihlak lohna turin ruahmanna chi hrang hrang an siam:

1. District tinah SP ten a tam thei ang police duty turin an ruahman ang a, a tul angin Batallion mite pawh an detail ang.

2. MST Bus-te Aizawl khawpui chhungah an service ang a, inzata inthenin, zing dar 7 atangin Ngaizel leh Zemabawk atangtein an tlan ang.

3. MCVU hi a nuar tak tak a nih chuan an nawrh chhung chu Aizawl khawpuiah lirthei intlanchhawk awm loin taxi 2W leh 4W-te service vek phalsak an ni ang.

4. Transporter pawl dang, nawrhna thlawp ve lote chu buaina an tawh lohna turin uluk taka venhimna ruahmansak tum an ni.

5. Mizoram sorkarin State Transport Authority hmanga public service phalna plying permit a pekte chuan dilnaa STA thupek zawm tura an intiamna lo ennawn leh turin kan chah a, hming an ziah hnan an intiamna zawm thei lote hnena permit kawltir reng kha a remchang zui kher lo ang.

Tarlan tawh angin petrol leh diesel-a chhiah lak tharte hi hmasawnna hna thawh nan hman vek tur a ni a, a tling khawm hmasate hi Aizawl leh Kolasib inkar kawngpui chhe lutuk siam that hna thawh nan hman nghal mawlh mawlh tum a ni ang.