PATHIANIN I HARSATNA CHU THUAMCHAKNAN CHE A HMANG

_Tihnghin rual loh_

By Rick Warren 

— Oct 09, 2024

“Kei Lalpa hi mi tin, an awm dan ang zel leh an thiltih rah ang zela pe tûra rilru en chhuaktu, thinlung fiahtu ka ni.” Jeremia 17:10

Engtiklai pawhin khawvelah buaina a awm a, chu buainaah chuan engtin nge Pathianin hna a thawh tih thlir zawk ang che. Tihnghin i nih ve lohna tura a zirtirnaah che hian thil ṭha lo aṭang pawhin thil ṭha zawk thlentir a duh ṭhin.

Pathian annaah i ṭhan zel theihna turin harsatna hrang hrang hmangin Pathianin a buatsaih che a, chher fo ṭhin che a ni. Rinnaa i ṭhan zel theihna tura daltu hlauhna emaw hriatna leh ngaihdan dik lo emaw te hmuhtir a duh che a ni.

Pathian chuan, “Kei Lalpa hi mi tin, an awm dan ang zel leh an thiltih rah ang zela pe tûra rilru en chhuaktu, thinlung fiahtu ka ni,” a ti. (Jeremia 17:10).

Pathian chuan i rilru en a duh a chhan chu "eng nge" tih ai chuan "eng vang nge?" tih hi a pawimawh zawk vang a ni. A hlimthla mai ai chuan a tak hi Pathianin a en duh a ni.

Israel fate khan thlaler paltlang tur khan kum 40 an hmang a. Rei tak thlalera an awmna chhan chu ramtiama lut tur meuh chuan an rinna a la chak tawk lo va, chuvang chuan fiahna chi hrang hrang an paltlang a ni. 

Bible chuan, “A thupêkte chu in zawm dawn nge dawn lo, in rilru hriat nan fiah tur leh tihrehawm tur che u a thlalera kum sawmli a hruaina zawng zawng che u kawng chu hre reng rawh u.” (Deuteronomy 8:2).

Chung kum 40 chhung chuan, Pathianin vawi sarih a fiah a, vawi khat mah an paltlang zo lo. Chuvang chuan, "thlalerah hian fiahna hmachhawnin awm chhunzawm rawh u," a ti niin ka ngai a ni.

Pathian pawhin thlalera a hruai chang che a awm mai thei, amah i rin theihna tur zawk a ni. Thlalera i awm laia pawimawh em em chu Pathian awmpuina chang lo nia i inhriat lai pawhin a pawimawh zawk chu a thu angin i kal em tih hi a ni zawk.

Bible chuan harsatna chu tihthianghlimna bel leh rawhtuina nen a tehkhin a ni: “Tihthianghlimna bel chu tangkaraw tan a ni a rawhtuina chu rangkachak tan a ni a, thinlung erawh chu Lalpan a fiah thin.” (Thufingte 17:3).

Pathian hnena i thil dil chu i hmuh hmain a fiah hmasa ṭhin che a ni. Fiahna chu rawhtuina mei anga a sat lai chuan, Pathian aṭangin i tlanchhia nge amah lam i pan zawk? Intihlar i duh vang mai maiin nge i nungchang i thlak? Mei chu a sat viau lai chuan Pathian hnenah inpekna tak tak i nei em? 

I nun a lo nghing a nih pawhin Pathian chuan i tana ṭha ber tur a duh a ni tih hria ang che. Bible chuan, “Nangni lama ka rilru putzia chu ka inhre si a, in hun hnuhnung tawpah chuan beiseina pe tûr che uin thil ṭha lo ni lovin ṭhatna ka ngaihtuah a.” (Jeremia 29:11).

Ngaihtuah zui atan

* Pathian awmpuina i chan miah loh lai pawha a duh anga ke pen chu engnge awmzia ni le?

* Engtiklai khan nge i harsatna tawh chu tithianghlimtu ang maiah a lo chan? I nuna eng thil bawlhhlawh nge a kan fai le?

* Pathian chuan, “Nangni lama ka rilru putzia chu ka inhre si a, in hun hnuhnung tawpah chuan beiseina pe tûr che uin thil ṭha lo ni lovin ṭhatna ka ngaihtuah asin.” (Jeremia 29:11). Chu chuan nangma tan emaw i hmangaihte tan beiseina engtin nge a siamsak che?

*[Lettu: Sangpuia]*