PATHIAN ZAWNG RAWH, A THILPEK CHAUH NI LO VIN

_Ni 40 Chhung Tawngtaina_

-  Rick Warren 

-  Oct 1, 2024

“Hre thiama, Pathian zawng reng reng an awm emaw tiin Lalpa chuan van atangin mihring fate hi a zuk en a” Sam 14:2

Kristian tam tak chuan amah Pathian zawng lo vin Pathian hnen atangin thil engemaw an beisei thin.

Damna leh chaktharna i dil hian thilmak i dil tihna a ni a a tha a ni. Chutih rual chuan i zawna chu Pathian ni sela, Pathian hnen atanga thilpek emaw, hausakna emaw thil danglam bik te ni lovin. I tawngtaina chu hetiangin ni sela, “Lalpa, ka duh a che. Hriat chian che ka duh e.” Pathian i zawn chuan thil dang engkim i hmu tel thin.

Pathian chuan Bible-ah amah zawngtute tan thutiam engemaw zat a nei a:

“Ka hming pu ka mite chuan inngaitlawma an tawngtai a, min zawn a, an awm dan sualte an hawisan chuan, van atangin ka lo ngaithla ang a, an sualte ka ngaidam ang a, an ram chu ka tidam leh ang.” 2 Chronicles 7:14

“Mi hmangaihtu chu ka hmangaih a, thahnemngai taka mi zawngtute chuan mi hmu ang.” Thufingte 8:17

“Rinna lovin ama lawmzawng mi nih rual a ni lo; Pathian hnena lo kal chuanin, ani chu a awm tih leh zawngtute hnena lawmman pek hmang a ni tih rin tur a ni.” Hebrai 11:6

“Lalpa in Pathian chu in zawn a, in thinlung zawng zawng leh in rilru zawng zawnga in zawn chuan in hmu leh ang … Lalpa in Pathian chu zahngai thei tak Pathian a ni si a: a thlahthlam lo vang che u a, a tiboral lo vang che u a, in pi leh pute hnena chhechhama a thuthlun chu a theihnghilh hek lo vang.” Deuteronomy 4:29, 31 

Pathian zawng rawh, a malsawmna chauh ni lo vin. Chumi awmzia chu, i duha chu a chhanna i hmu emaw hmu lo emaw pawh nise, Pathian hriatnaah lawmna i nei zual ang. I tana tha ber tur nia i hriat i hmu lo a nih pawhin, Pathianin i tana tha ber tur nia a hriat a pek cheah chuan i lung a awi ang. 

I nunah harsatna, inthenna emaw nau chhiatna emaw thil dang emaw pawh i lo tawk a nih pawhin, i nat laia i zawn aia nasain Pathian chu zawng rawh.

Hei hi hun khawhralna mai mai tur a ni lo. I hun awl kar lakah emaw i hnathawh zawhah emaw social media i khawih zawh vek hunah emaw Pathian zawng suh. Pathian hriat i tumna chu i hun laipuiah i dah tur a ni.

“Hre thiama, Pathian zawng reng reng an awm emaw tiin Lalpa chuan van atangin mihring fate hi a zuk en a.” Sam 14:2

Tihtak zeta Pathian zawng hi an vang ta hle mai. Mi tam zawk hi chuan Pathianin min thlak danglamna ai chuan a malsawmna hi kan zawng zawk a ni.

I hun awl remchangah i tih mai mai chuan Olympic-ah i tel phak lo vang. Chutiang chiah chuan i hun awl remchangah chauh Pathian tan hun i pe a nih chuan Isua Krista zuitu rinawm tak chu i ni thei lo vang. I hun neih hmasa ber leh tha ber pe la, a thu tiam te chu a pe ve ang che.

Ngaihtuah zui atan

* Thlarau lama i ṭhanna atan i hun remchang engtin nge i pek ve thin le? 

* A taka Pathian zawn chu eng nge awmzia? Thil dang zawng aia Pathian i hriatchian theihna turin nitinin eng thil nge i tih theih ang?

* A thilpek avang ni lo va a nihna avangin engtin nge Pathian hnenah lawmthu sawiin i tawngtai theih ang? Chu chu engvangin nge a pawimawh?

*[Lettu : Sangpuia]*