ṬAWNGKAM ṬHAIN I NI KHAR ṬHIN RAWH

_Ni 40 Chhung Tawngtaina_

-  Rick Warren 

-  Sep 25, 2024

“I chunga rilru nghattu chu, nangmah a rin che avangin thlamuang tak maia awm turin i veng ang.” Isaia 26:3

I ni hman tawp dan chuan i mut that leh that loh a hril thin a. I mut that leh that loh chuan a tuk lama i awm nawm leh nawm loh a hril leh zel a ni. Tum neia nung i nih chuan, i ni hman chu i khar that a ngai a ni. 

I ni hman chu malsawmna tawngkam thain khar thin rawh. Pathian Thu aia tawngkam tha a awm lo. Pathian thutiamte chhiar thin la. Thutak hmangin infuih thin rawh. Isaia lehkhabua thutiam ang te hian, “I chunga rilru nghattu chu, nangmah a rin che avangin thlamuang tak maia awm turin i veng ang.” Isaia 26:3

Khi thu hmanga ni i khar theih phei chuan, i mu tha lehzual ang, a chhan chu thudik pahnih pawimawh tak a awm vang a ni:

*Pathian chu thununtu a ni.*

Politician ten an thunun lo. Ram dang miten an thunun lo va. In hotuten an thunun lo. Nangman i thunun bawk lo. Pathian chu a thununtu a ni e. Bible chuan, “Lal thinlung chu Lalpa kutah a awm a, tui luanna kawng angin a duh duhnaah a tikawi thin.” Thufingte 21:1

Pathianin a thunun avangin thunun tum ve kher suh. I thawpikna zawng zawng lak ata amahah i hahchawlh theih nan a hnena i inhlan hun a nghak reng che a ni.

*Pathian leh a chhungten a tawpah hnehna an chang.*

Hei hi thawnthu tawpna a ni lo. Bible a bung tawpna ber i chhiar chuan, Pathianin hnehna a chang a ni tih i hria ang. I mut hma chiaha i thil en chu chanchin thar emaw TV emaw a nih chuan, rilru nuam lo takin i mut phah ang. Nimahsela Pathian Thu nen i ni i khar chuan, hahdam takin i mu thei ang. 

Mi sang tam tak nunna an suat laia damchhuak Corrie Ten Boom chuan, “Khawvel i en chuan, i thaw a pik ang a. A chhung i en phei chuan, i thaw a pik lehzual ang. Krista i en erawh chuan i hahchawl ang,” a ti a ni.

 Chawlhna chu khawiah nge i zawn? I ni i hman tawp hmain, Pathian Thu ngaihtuah thin rawh. Hetiang hian, “Pathianin a thunun a. Hei hi thawnthu tawpna a la ni lo, a tawpah hnehna kan chang ang. Lalpa, Mangtha le. Zingah kan inhmu leh dawn nia. ”

Tichuan, tui takin i mu thei ang.

Ngaihtuah zui atan

* Zana i mut that hian - taksa, rilru, thlarau leh inlaichinnaah eng nge danglamna i neih? 

* Engvangin nge Pathian Thu chuan hahdam takin a muttir theih che?

* Pathian Thu hmangin engtin nge nitin i khar theih ang, chumi ti tur chuan engtin nge pen khat talin i pen ang?

*Kristaa awmte tan thiamlohchantirna a awm lo.*

Bible chuan, “Krista Isuaa awmte tan chuan thiamloh chantirna reng a awm tawh lo” a ti  a. Isua i pawm thei dawn a nih chuan, thiamloh chan hlau tawh lovin, ama hnenah i nun hlan la, hetiang hian tawngtai rawh le:

“Duh tak Isu, ka sualna avanga nang nena inthenhran hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thil dang vang a ni lo i tih avangin ka ring che a ni. Ka nunah hian Lal ni turin ka pawm ta a che. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahni tana nun ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i tawngtai thei a nih chuan, he email-ah hian min lo hriattir la, min lo bia ang che Rick@PastorRick.com. Isua nena zinkawng i zawh tanna tura thil pawimawh a thlawnin ka pe dawn che nia.  

*[Lettu : Sangpuia]*