". . .'Min enchhin rawh u' titute hian enchhin an dawl lo ṭan hle," - MNF Sr. Vice President Dr R Lalthangliana

Aizawl | October 21, 2024: Vawiin October ni 21st, 2024 (Thawhtanni) hian Dt.05.11.2024-a Sinlung Hills Council inthlanna lo awm turah MNF Senior Vice President, Dr.R.Lalthangliana chuan Sailutar, Sawleng, New Vervek, Sakawrdai, Tinghmun, Zohmun, Lungsum leh Ratu khuate tlawhin campaign beihpui a thlak a.

Heng hmunahte hian MNF Senior Vice President chuan ZPM chu pawl 5/6 vel inthlungkhawm an ni a, tun sorkar ang hi Mizoramah a la piang ngai lo a, Congress leh MNF chu party malin kan sorkar thin a, party kan nghet hle a, ZPM hi chu an nghet ve thei tak tak lo. "Min enchhin rawh u" an tih avangin mipuiin ZPM kha enchhin an chak a, kan han enchhin ta a, thla 10 an sorkar chhung hian mipui rin ang an ni lo hle a, min enchhin rawh u titute hian enchhin an dawl lo tan hle a, rei an kal hi a rinawm loh a ni, a ti.

Ration card vara laten a let thawka man tovin an la a, AMC area-ah chauh a man to a la turin an insawi a, mahse, thingtlangah pawh a man to vekin an la leh si, oil man a to a, kawng a chhe em em a, sorkar hnathawk chungah an inluling hle a, mipui beng a thlep tan khawp mai, a ti bawk.

MNF Senior Vice President chuan Local Council 84 awmah 74 velah kan sorkar mek a, nakum lawka VC leh LC inthlan turah khian tun boruak kal mek thlirin kan sorkar leh ngei dawn niin a lang. Chuvangin, tun tuma Sinlung Hills Council inthlanah hian MNF kan sorkar ngei a tul a ni, a ti bawk.