NGOCC leh Zo United hruaitute inkawm

Aizawl | Sept 13, 2024: Vawiin ni 13.09.2024(Zirtawpni) chawhnu khan Central YMA Committee Room ah NGO Coordination Committee ( NGOCC) hruaitute leh Manipura Zofa unau pawl hrang hrang telna Zo United hruaitute an inkawm. Meeting hi Pu Lalhmachhuana, Chairman NGOCC (President, Central YMA ni bawk) in a kaihruai a, Pu Fabian Lalfakawma, Assistant Secretary, Central YMA in inlawmna thu a sawi.

Zo United hi Convener Pu Albert Renthlei hovin an tel a, Zo United a tel pawl hrang hrang - Hmar Inpui, Mate Tribe Council, Zomi Council, Mizo People Convention, Sukte Tribe Council, Paite Tribe Council, Tangkhal Tribe Organisation, Hill Tribe Council, Manipur Tribal Forum Delhi, Indigenous Tribes Advocacy Committee aiawh theuh te an tel. Pawl thenkhat kawng chhia leh harsatna dang avanga tel theilo an awm bawk.

Inkawmhonaah hian Zo United kal zel dan tur leh Manipur a Zofa unau hrang hrang te inpumkhatna leh inunauna chungchang te sawiho a ni a. Zo United hi Zofa unau hnam hrang hrang te lungrual taka an telna a nih avangin tih chak zel a tul thu te, inunauna leh inpumkhatna kawnga theihtawp chhuah a tul thu te sawiho a ni.

Zo United hi nikum (2023) September 7 ah khan NGO Coordination Committee in Manipura Zo hnahthlak unau pawl hrang hrangte nen Central YMA Committee Room ah din a ni.