Commerce & Industries Minister leh MEA Joint Secretary-in Bangladesh leh Myanmar nen insumdawntawnna sawi dun

Aizawl | September 13, 2024: Commerce & Industries Minister F Rodingliana cuan Mizoram tlawha lo zin Ministry of External Affairs Joint Secretary (Bangladesh and Myanmar) B Shyam IFS chu nimin khan a office chamber-ah kawmin, Minister hian Mizoram leh a thenawm ram Bangladesh leh Myanmar te nen a insumdawntawnna tha zawka kalpui dan tur a sawipui.

B Shyam hian India Sorkarin Myanmar ram chhung Paletwa thleng a power supply pek a, chumi hnuah Sittwe Port thleng a pek a duh thu Pu F Rodingliana, Power Minister ni bawk chu hrilhin, Mizoram Sorkar chu thawh dun puiah a sawm a. Power Minister hian Power Deptt pawhin DPR te siam a tih hlawhtlin an inhuam thu a lo hrilh a ni.

Mamit District-a Silsury khaw ep Bangladesh lam a market a that avangin Silsury emaw a bul hnai remchang laia Integrated Check post emaw Land Custom Station sak vat a nih theih dan tur te lo sawipui in, Kaladan Multi Modal Transport Transit Project (KMMTTP) hnathawh mek a harsatna awm te leh heng harsatna te hi chinfel a nih theih dan turte a lo sawipui bawk a ni. Bangladesh nen lei dawha a inkalpawhna tur ruahman sa Integrated Check Post Kawrpuichhuah bula leihlawn (bridge) siam tur chu Bangladesh lamin rem tihna (approval) an pek vat theih nan leh hnathawh bul tan a nih vat theih nan sorkar laipui ah lo nawr pui turin Minister hian a ngen bawk a ni.