MALSAWMNA I DAWN TE PHAL TAKIN KENG RAWH

_Nun Hunbi Hrang Hranga Ṭhan Dan_

- Rick Warren

- 1 September, 2024

_"Pathian ngaihsak hi lungâwina nên chuan a hlâwk khawp asin. Khawvêlah hian thil engmah kan luhpui lo va, engmah kan chhuahpui thei bawk hek lo."_ ( I Timothea 6:6-7)

Pathian chuan i nawmsakna aiin i nihphung a ngai pawimawh zawk. Lungawina bul i zirthiam zet loh chuan engmah a pe dawn lo che.

Lungawina chu tum neih loh lam a ni lo va. Hmachhawp neih loh lam pawh a nih hek lo. I hun tawn ang zela i hlimna a danglam ve mai lohna kha lungawina chu a ni.

Engtin nge lungawilohna chu i tih bo theih ang? Thil pakhat chu, thil engpawh i khaikhin fo ṭhin kha bansan rawh. Engkim kan khaikhin ṭhin - thawmhnaw te, in te, lirthei te, finna te, nupui/pasal thlengin.

I khaikhin apiangin lungawilohna i nei zel ang. Chuvang chuan, mi nena i inkhaikhin fo kha sim i zir a ngai.

Tirhkoh Paula chuan Philippi 4:12 - ah, _"Tlâwm taka awm dân ka thiam a, hausa taka awm dân pawh ka thiam bawk a. Khawi hmun pawh ni se,  tlai puara awm dân te, rilṭâma awm dân te, hausa tak leh tlachhama awm dân thurûkte chu thil engkimah ka zir chhuak tawh asin."_ a ti. Lungawina hi awlsam te a rawn awm mai a ni lo, kan zir ngai thil a ni. Ka zir chuan, Pathian chuan kan mamawh zawng zawngte min tih hlawhtlinsak a tiam a ni.

Bible vekin, _"Pathian ngaihsak hi lungâwina nên chuan a hlâwk khawp asin. Khawvêlah hian thil engmah kan luhpui lo va, engmah kan chhuahpui thei bawk hek lo."_ (I Timothea 6:6-7) a ti.

Lungawina kan zirna kawng a thil pawimawh tak pakhat chu engmah neih reng kan nei lo tih hi a ni. Hun eng emaw chen atan a hawhtir mai chauh kan ni. He khawvelah hian engmah i luhpui lova, engmah i chhuahpui dawn hek lo. Khawvela i awmchhunga i hman tur chauh mai zawk an ni.

Bible chuan chu chu enkawltu a ti. He khawvela i awm chhunga Pathianin thil a hawhtir che enkawltu mai chauh i ni a, i ta tak tak an ni lo. Pathianin i nun a malsawmna i dawnte enkawltu atana a ruat i ni tih i hriatthiam a, lawm taka i pawm chuan i lo hloh palh a nih pawhin i lungngai lovang.

Eng emaw lo hloh palh ta la engtin zel nge ni ang? Pathian dâwt khat tipingin awlsam takin dâwt dang a hawng leh thei a ni. Lungawi zir rawh eng thil mah hi a kumhlun dawn si lo. I nawmsakna ai chuan i nihphung kha Pathianin a ngai pawimawh zawk.

Ngaihtuah zui atan:

Lawmtaka Pathian malsawmna lo dawn tih hi engnge a awmzia?

Vawiin hian midang nen i inkhaikhin dan kha han ngaihtuah la. Inkhaikhin tura thlemna i tawhin engtinnge i chhan ang?

Enkawltu nih hi engnge a awmzia? He khawvelah hian eng enkawl tura dah nge i nih?

Lettu: Mapuia Fanai