Kawng chhiat vangin Sept 17 aṭangin Tuialhthei phurte tlan dawn lo!

Aizawl | Sept 15, 2024: Sairang leh Kawnpui inkar kawng chhiat lutuk vangin, September 17 aṭangin tuialhthei phur lirtheite an tlan dawn lo.

He thu hi Mizoram Oil Tanker Driver Association (MOTDA) leh Petroleum Entrepreneurs' and Transporters' Union of Mizoram (PETUM) te chuan thuchhuah inṭawm siamin an tarlang a, Lirthei khalhtu leh mipui kan him zawk nan leh chhiatna nasa zawk pumpelh a nih theih nan Kawnpui leh Sairang inkar kawng chhe zualpuite siam that a nih hma chu Ni 17 September, 2024 (Thawhlehni) atang chuan Tuialhtheiphur (Oil Tanker) te tlan chhunzawm tir tawh loh mai nise an ti.

"Kan tlan theih loh chhung a Tuialhthei lama harsatna a lo awm path anih chuan mipuite hriatthiamna kan dil e." tiin Mizoram Oil Tanker Driver Association (MOTDA) leh Petroleum Entrepreneurs' and Transporters' Union of Mizoram (PETUM) chuan an thuchhuahah hian an tarlang.