INREMNA RAWNGBAWL HNA

_Hunbi Hrang Hranga Ṭhan Dan_

-  Rick Warren 

-  Sep 10, 2024

“Nimahsela, engkim Pathian hnen ata chhuak a ni a; ani chuan Krista avangin amah nen inremin min siam a, inremna rawngbawl hna min pe a; khatia, Pathianin Kristaah chuan khawvel hi amah nen inremin a siama an bawhchhiatnate chu bawhchhiatnaa ruatsak lo vin, inremna thu min kawltir kha.” (2 Korinth 5:18-19)

Inlaichinna a lo chhiaa siamthat i duh a nih chuan, a chinfel dan ni lovin, inrem dan ngaihtuah zawk ang che.

Danglamna lian tak a awm a! Inremna chu inlaichinna siamthatna a ni a. I nupui hlui emaw i kawppui hlui emaw i nei tur tihna a ni lo va, i hmelma nen thian tha tak in ni tur a ni tihna pawh a ni chuang lo; mi dang nena buaina nei lo va inrem hi a ni zawk.

Chin felna awmzia chu harsatna zawng zawng chinfel vekna hi a ni, chu chu a thleng reng thei bik si lo. A chhan chu, nupa nunah te, thiante zingah te leh thawhpuite zingah inremna a awm reng thei lo, mi inanglo kan nih hlawm avangin. 

Nimahsela mi puitling chuan hriatthiam dan an zawng thin. Chu chu finna a ni. Isua Krista anna kawng a ni.

Inanna nei lo mah ila kan pumkhat thei a ni. Inhmu lo chung pawhin kein kan kal rual thei a ni. Ka nupui Kay-i nen hian kum 50 chuang kan lo innei ve ta a, thil zawng zawng kan inhmuhsak vek lo. Nimahsela ke kan pen duna, kan intanpui tawn a. Kan inrem tawn thin a ni. 

Nupui pasal neite counseling ka pek atanga ka hmuhchhuah chu: Inlaichinna chhia chu siamthat i duh a nih chuan buaina chu a lo kiang ve leh mai thin. I harsatna lian bera i ngaih chu vawi engzat nge harsatna te berah a inleh theih thin? Chutiang pawh chu a ni chuang lo. Inlaichinna siamtha tura i rilru i pek a ngai zawk a ni.  

Khawvela buaina hrang hrang karah hian ringtu i nihna angin inremna rawngbawl hna thawk turin ka beisei che a ni. Bang pingtu ni lo vin, lei dawhtu ni la. Mi dang hnawt tiautu ni lo vin, hui khawmtu nih tum zawk ang che.

Bible chuan 2 Korinth 5:18-19ah chuan, “Nimahsela, engkim Pathian hnen ata chhuak a ni a; ani chuan Krista avangin amah nen inremin min siam a, inremna rawngbawl hna min pe a; khatia, Pathianin Kristaah chuan khawvel hi amah nen inremin a siama an bawhchhiatnate chu bawhchhiatnaa ruatsak lovin, inremna thu min kawltir kha.” 

Isua Krista zuitu i nih chuan, inremna rawngbawlna hna hi i kut a ni. Kal chhuakin hetiang hian sawi ang che, “Pathian chuan amah nena inpawlna nei turin a duh che a. A hmelma nih tum suh. Nangmah hawisantu che ni lo vin. A ngaihtuah em em zawk che a ni. Pathian nen inrem rawh u. Pathianah chuan thlamuanna nei la. Chutiang zelin mi dang nen pawh lo inrem zel rawh u.”

Pathian khawngaihna i zawnnaah leh mi dang chunga khawngaihna lantir i duhnaah hian inremna rawngbawl hna chu nangmah ngeiin inlaichinnaah tan ang che.

Ngaihtuah zui atan

• In nupaah emaw thenrual zingah emaw harsatna i chinfel theih loh engnge awm?

• Chu harsatna chu inlaichinnaah chuan chinfel ai chuan inremna thlentir zawk turin engtin nge ke i pen ang?

• In chhungkua, i hnathawhna leh in khawtlangah inremna a thlen theihna turin engtin nge ke i pen ang? 

*[Lettu : Sangpuia]*