MI REL AI CHUAN MALSAWM ZAWK RAWH

_Min Ti Danglam Ta_

-  Rick Warren 

-  Aug 13, 2024

“Bawhchhiatna thuptu chuan inhmangaihna a zawng a, thil sawi sawi hmang chuan ṭhian bulte a tiṭhen ṭhin.” (Thufingte 17:9)

Mi tu pawh hian kan nunah hian min chhaihkawlhtu hi kan tawng theuh mai. Thil an rawn beisei emaw, min hua emaw, min dahhniam emaw a ni thin.

Eng pawh lo ti sela, kan huatna turin an ti thin. Chutiang zelin i thian tha hnenah i hrilh chhawng ve a, “Kan chunga an thiltih chu mak i ti viau ang!” Tawngkam danga sawi chuan, heng mite hian mi an reltir phah zawk che a ni.

Mi rel chu eng nge ni? Anmahni hnena tlang taka sawi lo va, an hnunglama sawi sep sep hi a ni. Mi dang hnena mi chanchin an thatna tur ni si lova va sawi hi a ni. A awmzia dik takah chuan mi rel chu, mi dang va thungrulhna hi a ni.

A tawi zawnga sawi chuan, mi i rel khan nuam i ti mai thei a - nimahsela i va rela khan hnehna a chang zawk daih a ni. Chung mite chuan i rilru leh ngaihtuahna thunun se i remti tihna a ni. Chu vang chuan thil tha zawk ngaihtuah aiin chung mite rel nan chuan i hun tam zawk i hmang tihna a ni.  

Mi rel chuan thil tha lo a thlen a ni. Bible-in a sawi vek a lawm. “Bawhchhiatna thuptu chuan inhmangaihna a zawng a, thil sawi sawi hmang chuan thian bulte a tithen thin.” (Thufingte 17:9). Mi kan rel chuan kohhran, chhungkua leh sumdawnna kan tichhia a. I thian tha a ṭhentir che a. I nun thlengin a ti chhe thei a ni.

Nimahsela thlentir suh. Mi dang rel hi i duhthlanna liau liau a ni - chu ai chuan malsawm zawk ang che.

Bible chuan 1 Petera 3:9 ah, “Sual, sualin thungrul suh ula, hauna, haunain thungrul hek suh ula, malsawm hlauh zawk rawh u. Hemi avangin koh in ni si, malsawmna chang tur hian.”

Mi i rel thei ni mah se - Pathian malsawmna i hloh phah thung ang.

A nih loh pawhin tawngkam thain mi dang chungchang sawi la, mi dang a dawm kang ang a. Chutianga i tih chuan, i nunah Pathian malsawmna i dawng ang.

Ngaihtuah zui atan

* Engtik hunah nge mi rel i chak thin? I hmalam hunah thlemna chu engtin nge i pumpelh theih ang?

* Mi i rel chuan i nunah engtin nge a tha lo zawngin thil a thlentir?

* Engtik hunah khan nge mi rel aiin mi dang malsawm i thlan? Engte nge  a rahchhuah?

*[Lettu : Sangpuia]*