INNGAIHSAK TAWNNA NEN IN INDUHNA CHU CHHEM ALH RAWH

_Min Ti Danglam Ta_

-  Rick Warren 

-  Aug 14, 2024

“Mi tinin ngaihthlak chuh sela, thusawi chuh lo sela, thin tinel rawh se.” (Jakoba 1:19)

Inneihna tluang hi a lo thleng ngawt lo. Inneihna chu nangmahni thlentir a ni tlat. In inneihna chu eng pawh chu lo ni sela, i duh chuan inlaichinna tha zawk i siam thei a ni. 

Ni engemaw ti chhung chu kawppuite nena Pathian inhnaih zel theih dan tur kan zir dawn a ni. Inneihna bakah kan nun chhoh zelna atan pawh a tangkai vek dawn a ni.

Inneihnaah a ni emaw, inthianthatnaah a ni emaw, thil pakhat inlaichinna tha zawk siam tura kan zirchhuah tur chu - inngaihsaktawnna hi a ni.

Mi tu emaw i ngaihvena i ngaihsak a nih chuan, i nunna a then a zar i pe ve tihna ang a ni.

I hun chu i nun a ni, a chhan chu i neih let tawh dawn loh avangin. Chuvangin i kawppui hnena hmangaihna i lantir dan tur chu ngaihsakna hi a ni. Chungah chuan tawngkam mawi leh duhawm tak, ‘ka hmangaih che’ tih sawichhuah te pawh  a hlu em em a ni. 

Hei hi thudik chu a ni, inngaihsakna atangin hmangaihna a lo piang tih hi. Mi i ngaihsak tan viau a, ani pawhin a lo ngaihsak let ve che a. Pangpar leisakin, thuziak te pein leh phone pawhin i bia a. In hun awl pawh in hmang dun thin a. 

Nimahsela zawi zawiin i ngaihsak zawng a danglam a. Tunah chuan bill pek te, naupang enkawl te, tui zawng tih te leh hna lama insawrbing te a ni tawh. I kawppui chuan i nunah hmun lian ber a chang tawh lo mai thei. Rilru pekna inthlak hi a awm ve chawk thin, in inngaihsak tawnnaah khan in let leh lo a nih chuan, in inneihna chuan rei a daih lo mai thei a ni.

In inngaihsak tawn theih lohna chhan pakhat chu in ingaihthlak tawn loh vang a ni. Chapona avangin i kawppuiin a sawi chu hria angah i inngai a, a ngai chu a sawi nawn mai maiah i ngaihsak a ni. 

I kawppui thusawi chu i ngaithla tawh lo a nih chuan, vawiin atangin ngaithla tan ang che. Eng vangin? Pakhatna, i hmangaih a ni. A thusawi i ngaihthlaa i ngaihsak a nih chuan, i hmangaihna i lantir a ni.  A dawtah chuan, a chang chuan i kawppui kaltlangin Pathianin thu a sawi. I kawppui chuan nangmah aiin thil a thlir thiam zawk pawh a ni thei, i kawppui chuan i hmuh loh lai te hmuin, hmu thei turin a pui thei che a ni.

Pathian chuan a Thu-ah min hrilh a, inngaihsakna hmanga kawppui te ngaihthlakna hian inneihna hi a ti tluang a ti. Jakoba 1:19 ah chuan, “Mi tinin ngaihthlak chuh sela, thusawi chuh lo sela, thin tinel rawh se,” a ti.  He changin a sawi, a hmasa pahnih hi i zawm chuan, a pathumna chu i ti thei nghal ang. Chutianga i tih zel chuan, in inneihna chu a tluang zel ang.

In inneihnaah induhna chu chhem alh zel a nih theihna turin, i lo bansan tawh te kha i tih leh a ngai a ni. I ngaihsakna lantir rawh. In inngaihsaktawnnaah chuan, fanau malsawmna in dawn hnuah te, i hnaah leh in lo upat chhoh zelnaah pawh in tluang zel ang,  

Ngaihtuah zui atan

* Engti zawngin nge i kawppui hnenah in inneih hlim khan  i ngaihsakna i lantir thin?

* Jakoba 1:19 ah chuan, “Mi tinin ngaihthlak chuh sela, thusawi chuh lo sela, thin tinel rawh se,” a ti a. He thu hi in nupa inkarah leh i laina te hnenah engtin nge i lantir ang?

* I kawppui chu i ngaihsak leh zual theihna turin vawiinah hian eng thil pakhat nge thlak danglam tur i neih? Chu chu i hnathawh dan thlak te, i kawppui nena in inkawm laia TV en off te, cell phone khawih loh te pawh a huam tel vek a ni.

*[Lettu : Sangpuia]*