Sak ṭan aṭanga kum 10 chuang hnu-ah Siahaa Nursing School building la hawng thei lo!

Aizawl | August 9, 2024: Sak ṭan a nih aṭanga kum 10 chuang hnu-ah Siahaa Nursing School building chu hawn thei a la ni lo!

Vawiin khan Siaha-a Nursing School building sak mek, kum 10 chuang hnuah pawh, tun thlenga hawn theih lohva awm mek chu mi thahnem ngaiten a hmunah tlawhin an enfiah.

He building hi District Hospital - Siahathlah (via AR) kawngpui an a awm a ni a. Building hi Centrally Sponsored Scheme niin, Ministry of Health and Family Welfare Govt of India atangah sak a ni.

He building hi kum 2012 atang khan sak tan niin; kum 2014- a sak zawh tura ruahman a ni laiin Vawiin thlengin hawn thei ala ni lo.

RTI zawhna chhanna atanga a landan chuan he Building sa tu (Contractor) hi Pu Lalparmawia, Chanmari Aizawl a ni a, Mizoram First Class Contractor niin registration no chu: 34/E-in-C-1/2022 a ni. A sak hna thawktu erawh chu Pu K. Beisa Siaha Vaihpi a ni thung. (Pu Beisa hian Pu Lalparmawia hming a hawh nia hriat a ni.)

He building, Siaha district tana chhawr naawm tak tur hi 24-08-2012 atanga sak tan a, 24-08-2014 ral hmaa zawh tur a nih laiin, hnathawktu hian hun tiam chhunga a zawh theih loh avangin thla sawmpahnih (12) chhung (26-08-2015 thleng) hun pawhsei sak leh a ni.

RTI chhanna aṭanga a lan danin, Revised estimated chungchangah zawhna chhangin, Contractor hian Price escalation avangin amount revised a dil a, contract agreement an lo neih-ah revision phal a nih si loh avangin revised a ni lo a, hun tiam chhunga sak zawh loh a nih avangin Department-ah hand over a la ni lo a ni.

He building sak nan pawisa (Amount) sanctioned zat RTI zawhna chhanna ah chuan pek zawh vek tawh a ni a, Rs 310,68,885.00 a ni a, Ni 17-02-2016 ah pek chhuah vek tawh a ni.

Tun thlengah hawn theih a ni lo chhan zawhna chhangin Pu Beisa chuan, thil man a to chho zel a, hei vang hian pawisa adaih loh hle a, department ah Schedule of Rates (SOR) dil bel ani a, tun thlengin min la pe chhuak thei loh a, he adil belhna hi department lam hian an pechhuak thei chuan renovated tur tlem awm pawh hi hun reilotea zawh nghal thei thu leh hawn theih thuai a beiseih thu a sawi bawk a ni.

- Vabeihruasa