Assembly Speaker Bangla cheiṭhat leh bungraw lei nan cheng nuai 23 chuang hmang!

Aizawl | August 27, 2024: RTI Act hmanga zawhna Mizoram PWD Building Division-in an chhanna aṭanga a lan danin, ZPM sorkar hnuah Assembly Speaker Pu Lalbiakzama Bangla cheiṭhatna leh bungraw lei nan Rs 23,40,000/- sen a nih thu tarlan a ni a. Bangla cheinan bik Rs 8,40,000/- sen niin bungrua (Sofa, dining table, doormat, etc.) lei nan nuai 15 sen a ni bawk a ni, tiin MNF chuan thuchhuah siamin an tarlang.

Chief Minister Pu Lalduhoma'n sorkarna an chan hlima thuthar lakhawmtute a kawmnaah Bangla chei nan sum hman vak vak ṭha a tih loh thu leh chutiang tih ve an tum loh thu a sawi a. Chutiang a nih laia Speaker in a bangla Rs 8,40,000/- laia a chei tir leh bungraw (Sofa, dining table, doormat, etc.) lei nan nuai 15 lai sorkar pawisa a hmang hi a intuha lo hle a. Hei mai bakah hian Minister leh MLA dangte quarter pawh chei ṭhat a ni hlawm tih kan hria a ni.

ZPM hi an sawi loh ang hlirin an awm tih hi chu tlang hriat a ni tawh a. Mipui pawhin ngaiah kan nei tawh a. Chutih laiin sum renchem leh sorkar insawhngheh kumah an puang mek a. An mahni ber a bawhchhetuah an ṭang zel mai hi a pawi hle a. Sum indaih lohna avangin Zoram pum kawng chhe em em pawh an siam thei lo a, sorkar-in vaibelchhe telin sum a puk reng a. Chutih laia Bangla cheibawlna tura sum tam tak a luang hi a uiawm hle.

ZPM sorkara thuneitute hian dawt sawi an hreh lo a, an intiamna bawhchhiat an hreh lo a nih pawhin mipuite hi chhete talin zah ve se kan duh hle.