Aizawl khawpui chhungah raipuar leh damlo, emergency a phurh ngam an ni tawh lo!

Aizawl | August 27, 2024: MPCC chuan vawiin khan thuchhuah siamin, "Aizawl khawpui chhungah raipuar leh damlo, emergency a phurh ngam an ni tawh lo," an ti a, "sorkar inthlahdah vang liau liau a ni,' an ti bawk.

Tuna ZPM Chief Minister Pu Lalduhoma hian ZPM a sorkar chuan kawng tlo lo hi a tlo nghal vek dawn tiin vawi tam tak Campaign-naah a sawi ṭhin a. Party dangten sokarna an chan laiin a bik takin Aizawl khawpui chhunga kan kawngpuite hi a chhe ngai lo. Aizawl khawpui chhungah raipuar leh damlo, emergency a phurh ngam an ni tawh lo te hi Sorkar inthlah dah vang liau liau a ni a. ZPM an sorkar hnuah ṭhal laia inbuatsaihna hun zau tak a awm chunga kawngpui thawm ṭhat hna an thawk duh lo leh a thawm ṭhat ṭhenkhat pawh a beitham lutuk hi Congress Party chuan mak a tiin PWD Minister a dem tak zet a ni.

Mizoram hmun hrang hrangah kawng chhe lutuk avangin mipuite châk laknaah harsat nasa tak an tawk mek a, Mizoram ei leh bar chawk luhna ber Silchar-Aizawl road te pawh bungrua phur motor te an rawn kal duh tawh lovang, tih hlauhawm khawp in a chhe hle a ni. Khaw tam takah Maxicab te kawngpui a chhiat avanga an service duh lo leh kawng a chhiat avanga School naupangte'n kawng an zawh ta hial hi Sorkar mualphona a ni tih hre nawn a. A rang thei ang bera hma la nghal turin Congress Party chuan PWD Minister hi kan phut tlat a. Chhuanlam tur zawng ringawt a, in sawifiah reng ringawt lovin, hna tak tak thawk ṭan tawh turin kan duh a ni.