World Cosplay Summit-ah India aiawhin Mizo tlangval pahnih

Aizawl | July 29, 2024: World Cosplay Summit-ah India aiawhin Mizo tlangval pahnih; Reuben Lalchuangkima s/o C.Lalrinthanga(L), Chanmari West leh Lalchhuanawma Siakeng s/o R. Lallunghnema, Model Veng te an inlan dawn.

Anni pahnih hi khawvel cosplay intihsiakna lian ber te zing a mi WORLD COSPLAY SUMMIT 2024, September 1 - 5 chhunga Japana neih turah India aiawh tura thlan an ni.

Anni pahnih hi India rama team tha zual 12 inelna, June 1, 2024 a neihah pakhatna dinhmun lo hauh tawh an ni. Anni hma hian Mizo tlangval pahnih Reuben Zorindika leh Dominic a te chu India aiawhin kum 2019 khan an lo han kal ve tawh bawk.

He Championship hi kut themthiamna leh an lemchan thiamna bik endik chungchang ah an khirh hle a, ram 35 lai an tel dawn a, an intihsiakna tur hi khawvel a tha ber nih theihna tur championship a ni nghe nghe.

World Cosplay Summit intihsiakna hi 2003 atang khan Japanah neih tan a ni a. World Cosplay Summitah hian ram pakhat atangin team khat thlan chhuah an ni a, member 2 zel team khatah awmin, an kut themthiamna mai ni lo, an character cosplay tur te chu an original character an pho chhuak reng em tih te endik thin a ni.

Reuben Lalchuangkima leh Lalchhuanawma hi Mizoram Cosplay Organization member niin, kum 10 chuang cosplay ah hian an lo in hnamhnawih tawh a, World Cosplay Summit, Japan ram a intihsiakna turah hian Japan anime show lar tak Naruto Shippuden a mi Hashirama Senju leh Madara Uchiha lem changin an Art leh Creativity an han phochhuak ve dawn a ni.