LPS Fight Night Mipuiin an hlut!

Aizawl | July 28, 2024: Professional bul a tannaah awlsam takin HC Johnkenty Vanhlimpuia a chak a, zirtawpni zan Bosch Home Appliances LPS Fight Night lightheavyweight round hnihnaah technical knockout-in Pushpak Verma a hneh.

LPS Arena chhunga mipui sang hnih chuang pung khawm hmaah kum 27 mi Vana'n round hnihna tirah chiang takin a lu-ah a hneksak a, um zuiin hruihrual kilah a hual chep a, na tak taka a hnek zawn laiin Rajasthan boxer Verma a talbuai a, chhang let lova a inveng ringawt avangin referee Malsawmsanga'n inhnek a titawp.

Round hnihna tan atanga second 40-ah Tuipui boxer a chak a, kum nga leh thla li chuang hnua Mizorama a inhnek leh hmasak berah a chet that a chhunzawm a, boxing coach nih zui a tum avangin a inhnek hnuhnun ber tur a ni tawh a beisei tih a sawi nawn leh a, a inhnek ngaihlutu Mizo mipui chungah lawmthu a sawi a ni.

Indian Navy chhuanvawr Vana hian March 12, 2019 khan LPS Pro Fight lightheavyweight title fight-ah round khat khel zo lovin amah chotu Hrianghmun tlangval DK Munga a knockout a, tun hi Mizorama a inhnek leh hmasak ber niin professional a luhchilh nghal a ni.

Pro Fight middleweight-ah vawi hnih a champion zawn hnuah 2016 khan lightheavy-ah a insawn a, he huangah hian Mizo leilunga a inhnekpui hnuhnun ber Verma nen knockout hmangin tum sarih a chak zawnna a ni.

Kum 29 mi Jaipur tlangvalin Mizoramah hun chhia a hmang ve thung a, professional a luhchilh atanga tum thum a inhnek thlengin a chak vek a, mi pahnih a knockout. Vana hmaah beiseiawm takin round khatna a hmang zo mah se, na taka hnek a tawrh hnuah a vawi khat nan professional huangah a tlawm a ni.

Verma hi chawpchilh taka sawm a ni a, Vana hmaah a inringtawk lo tih a khelh dan atangin a lang a, mipui beiseina inhnek a lantir zo lo a ni.

FIGHT NIGHT : AWLSAM TAKA VERMA A HNEH HNUAH VANA'N CHAWLH A TUM

=========

Laldinsanga'n hnek tluk a tumna tihlawhtling zo lo mah se zirtawpni zan Bosch Home Appliances LPS Fight Night-ah a hma aia chiang zawkin Ramdinthar a hneh nawn.

Kum 21 mi Dinsanga'n knockout theih ngei a inring a, thiamna leh thahrui tha tak nen inhnek thunun zawk mah se round ruk a inhnek hmasak berah Pangzawl tlangval Ramdina a ding tluan.

Ramthar Lunglei boxer-in round tin la vekin judge pathum point pekah 60-54 vekin a chak a, professional boxing vawi sarih a khelhna niin a chak vek a, kum 23 mi Ramdina erawh nikum LPS Pro Fight bantamweight title fight ang bawkin Dinsanga lakah a tlawm nawn a, an intawn vawi hnih hi professional huanga a inlan tum hnih a nih avangin a tlawm ve ve a ni.

Nikum November khan LPS Arena-ah hmuhnawm takin an innuai tawh a, rin hlawh zawk Dinsanga'n inlehthalna pumpelh derthawng takin a chak a, a hmun ngaiah bantamweight-ah bawk intawng lehin a tir atangin LPS Pro Fight champion Dinsanga'n fimkhur takin a hmachhawn.

Ramdina'n a ralthuam hlauhawm a vei leh ding na taka a vai chhuah zawn thin a hlawhtlinpui tawk lo va, a hnek fuh changin mipui au tham a ring hle thung. Kut rang zawk Dinsanga'n a hnek tam a, khelh dan chi hrang leh thiamna sang zawk hmangin a chungnung.

Round thumna tawp lam atangin Ramdina khel a tla hniam a, chuti chungin hmuhnawm thamin a khel tluan a. A tawp thleng mar taka inlan thei Dinsanga'n, 'theihtawp a chhuah a, a thawhrimna Pathianin mal a sawm' tih a sawi.

Ramdina'n mipui beisei a pha lo tih a sawi rualin, 'a hneh loh Dinsanga'n a thawkrim tih a hria a, Pathianin a chawi sang a, chak a phu zawk a nih angin duhsakna a hlan a, a tawngtaipui reng dawn tih a sawi bawk.

An intawn hmasak aiin Dinsanga tan kawng a awlsam zawk a, hma a sawn tih a lantir rualin Ather Rizta Fighter of the Night lawmman cheng singkhat a dawng a ni.

FIGHT NIGHT : DINSANGA A HMA AIA CHIANGIN RAMDIN A HNEH

==========

Lalruatzela Hauzel chuan Lalmuanpuia hnehin professional huangah a chak zawn a, zirtawpni zan Bosch Home Appliances LPS Fight Night inhnek dangah Vanlalenkawltir leh Lalrinngheta an inhnehtawk.

LPS Arena-ah Ruatzela'n round li la vekin judge pathumin 40-36 vekin an chaktir a, professional a luhchilh atanga a inhnek hmasak pahnihah tlawm zawn mah se nikum Pro Fight welterweight title fight nen vawi hnih a chak zawnna a ni.

Kum 21 mi Muanpuia'n welterweight-a a khelh hmasak berah chet a harsat a, professional boxing a khelh tum hnihna niin a tlawm ve ve a ni.

Round khatna atangin Ruatzela'n panin a vei leh dinga a hnek zawn thin bakah a invenna karah a hnek lut fo a, Luangmual Lunglei boxer-in chhan let tumin bei ngawrh hle mah se a tuar tam a, kut chhuak leh tharum bakah thahruiah kum 22 mi Mission Veng tlangval a chungnung a, knockout a tumna erawh a puitlin thei bik lo a ni.

Super flyweight-ah Enkawla'n a vawi khat nan professional boxing-a chak a tumna a tihlawhtling zo lo va, amah aia kum khata upa, kum 22 mi Rinngheta nen round li an inbeih hnuah judge pakhatin 40-36-in round tinah a chaktir a, mahse, judge pahnih 38-38 ve ve an pek avangin an inhnehtawk phah ta a ni.

Dinthar Champhai figher Enkawla'n mittlung zawk mah se chak tur khawpin judge pahnih a hmin zo lo va, a pantu leh hnek chhuak tam zawk a nih laiin Tuipui tlangval Rinngheta'n tawlh kual panin fuh tak takin a hnek let fo a, boxer pahnih an fimkhur a, an inhnek a nung tawk lo.

Professional huangah 2022 Pro Fight bantam champion Rinngheta'n a inlan vawi lina niin khelh thum a chak zawn hnuah a chak zawh loh hmasak ber a ni a, Enkawla erawh vawi hnih a inhnehtawkna niin tum khat a tlawm tawh a, chak a nei lo zui zel.

FIGHT NIGHT : RUATZELA A CHAK, ENKAWL LEH RINNGHETA AN INHNEHTAWK

==========

Emmanuel Vanlalthlengliana leh L Joseph Buihringpachha chuan Bosch Home Appliances LPS Fight Night-ah unanimous decision-in Benjamin Lalrindika leh H Zomuanpuia an hneh.

Zirtawpni zanah Falkland-ah amatuer inhnek tum hnih awmin light flyweight-ah Melthum boxer Thlenga'n round thum a la vek a, kum 18 mi Didika lakah 30-37, 30-27, 30-27-in a chak a ni.

Kum 22 mi Thlenga'n thahrui tha tak lantirin a nawr hnem a, hnek chhuak tam zawk a nihna hmangin a thunun a, Chhinga Veng rawltharin fuh taka hnek nei ve tho mah se a chhang let hneh lo.

Featherweight-ah Siaha rawlthar Joseph-a'n round thum an inhnek hnuah 29-28, 30-27, 30-27-in Muanpuia a hneh ve thung a, an pahnihin Khelo India Centre of Excellence hnuaia inzir lai niin sang tak thleng thei tura beisei an nih angin boxing hmuhnawm pangngai takin an lantir a, kum 15 mi, veikhawr Joseph-a'n amah aia kum khata upa Kolasib rawlthar lakah thiamna a nei tha takin a entir a ni.

Inhnek tan a nih hmain hun hawn nan kum 10 hnuai lam naupang pangain LPS Arena chhunga a khata mipui pung khawm hmaah boxing thiamna an lantir a, an hma lam hun atan leh naupang dang fuih phur nan lawm hlawh takin an inlan a ni.

Amatuer inhnek vawi hnih bakah professional inhnek vawi li a awm a, tluang leh hlawhtling taka zawh a nih rualin Organising Committee chuan Mizo mipuiin Mizo tlangval inhnek an ngaihlu hle niin a hria a, lawmawm a ti hle a ni.