Union MOS For Minority Affairs hovin BJP extended state executive meeting nei

Aizawl | July 11, 2024: Vawiin 11th July, 2024 (Thursday) chawhma Dar 11:30 aṭanga ṭanin Extended State Executive Meeting, BJP Mizoram State Office, Upper Republic ah neih niin, he hun hmang tur hian Pu George Kurian Union MOS For Minority Affairs leh Pu Devesh Kumar MLC Bihar State, Mizoram State Prabhari te chu an lo kal a, District hrang hrang hruaitu te he hun hmang tur hian an lo kal khawm a ni.

Inkhawm hi Session hnih a neih niin, Session hmasa hi Pu Malsawmtluanga, State General Secretary-in a kaihruaia, Session hnihna hi Pu Vanlalhmuaka State President-in a kaihruai bawk a ni.

He hun hmang tura lo kal Pu George Kurian chuan thusawiin, "Ka nunah hian a hmasa berah Lal Isua Krista hi ka dah ṭhin a, ṭawngṭai hi ka ngai pawimawh êm êm a ni. Ka naupan laiin kan Mathematics zirtirtu chuan Mathematics subject thiam tur chuan formula kha sawi reng mai tur, in awm mai mai pawhin in rilru in sawi reng rawh u min ti ṭhin a, chutiang chiah chuan ram rorelna ah dikna leh hmasawnna a lo thlen theih nan kan ṭawngṭai reng mai tur a ni. Fianrial hunah chauh ka ṭawngṭai ngai lo, tunah pawh in zingah ka ṭhut a ka lo thlen tirh pawhin ka ṭawngṭai a, kan nun hi ṭawngṭai nun ni se, chutianga kan tih chuan Lal Isua Krista hian min kaihruai anga, chutianga ṭawngṭai mi te chuan Isua an dah hmasa lo thei lo a ni," a ti.

Pu George Kurian chuan, "BJP chu development party a ni a, development duh zawng chu BJP ah lo inpe vek turin ka sawm che u a,

Ka ministry hnuaiah scheme hrang hrang awm te chu kan duh a nih chuan theihtawp chhuahin ka lo ṭanpui dawn che u a,Prime Minister Pu Modi-a hian community tin te ang khat vekin min en a, Development hi India mipui huapin kan kalpui mek a ni," a ti.

Pu George Kurian chuan sawi chhunzawmin, "1980 ah BJP ah ka inpe a, kan khuaah 95 % hi Kristian kan ni a, tuman mak min ti lo va BJP chu anti-christian a ni an ti ve ngai lo Chuvangin BJP hi Anti-Christian kan ni lova, Politics-a inbeihna mai a ni tih hi kan hriat a ngai a, BJP inghahna thurin chu integral humanism a ni a ni. Hmasawnna tluantling kan neih theih nan nangni pawh ṭawngṭai nun lo nei ula, BJP hian Mizoramah hmasawnna dik a thlen ve ngei ka beisei tlat a ni," a ti bawk.

Inkhawm hmasa neih zawh ah hian Pu George Kurian chuan thuthar thehdarh tute kawmna hun a nei bawk.

Extended State Executive Meeting ah hian BJP MLA te, MADC Chairman leh MDC-te pawh an tel bawk a ni.