ṬANPUI DILA I ṬAWNGṬAI ANIH PAWHIN, FAK PHAWT RAWH

_I Mamawh Tawpkhawk Pathianin a Pek Dan Che_

— Rick Warren 

— July 16, 2024

“Jehosaphata chu LALPA inah, kawt hung chung thar bulah Juda-ho leh Jerusalem-ho pungkhawm zingah chuan a ding a; a ṭawngṭai a.” 2 Chronicles 20:5-6

Hringnunah hian hun khirh tak kan hmachhawn chang a awm a, kil hrang hrang aṭangin an beih chang che a awm ṭhin ang. Chutiang dinhmun chu Israel Lal Jehoshaphat-a hnenah a thleng ve a, ram pathumin a ruala an beih lai chuan Pathian hnenah a ṭawngṭai a. Chutiang harsatna chu i patlang theihna turin, Jehoshaphat-a anga i ṭawngṭai a ngai a, tichuan ṭanpuina i hmu ang.

Jehoshaphat-a chuan 2 Chronicles 20 ah thil pathum a ti a, nang pawhin i ti ve thei a ni:

*Pathian lam hawi leh rawh.* Harsatna chu i hmaah a lo awm a nih pawhin, Pathian nungchang leh a thutiam lamah rilru dah tlat rawh. Jehoshaphat-a chu a ṭawngṭai a, “Aw Lalpa, kan pi leh pute Pathian, vâna Pathian i ni lâwm ni? Hnam tin chunga rorêltu i ni lâwm ni? I kutah chuan thiltihtheihna leh chakna a awm a, tuma chelh rual i ni lo va.” (2 Chronicles 20:6). Hetiang hian a inbunruak a ni, “Lalpa, ka thil hmachhawn tur zawng zawng ai pawhin i lian zawk.” I harsatna hmachhawn mek chu a lian viau a ni mai thei e, Pathian ai chuan engtikawng mahin a lian dawn lo a ni. I rilru thlak la Pathian lam hawi ang che.

*Hun liamtaa Pathian rinawmna kha hre reng rawh.* Jehoshaphat-a chuan Pathianin Israel fate a hruaina zawng zawng a ngaihtuah chhuak a. Hun kaltaa Pathian rinawmna hriat reng hian hmalam hun atana Pathian rinna a tinghet a ni. I nuna Pathian hnathawh ropui tak kha i hriatchhuah fo a ngai a ni.

*Pathian ṭanpuina dil rawh.* Jehoshaphat-a chu hetiang hian a ṭawngṭai a, “Lalpa, i tan chuan harsatna lian lutuk a awm thei lo va. Hun liam tawhah khan min pui fo tawh a. Tun hunah hian min pui leh ang che!” Pathianin a hmangaih che a, i harsatna te pawh a ngaihsak a ni.

Jehoshaphat-a ṭawngṭai nun chu zawhna pathumin a ṭhen theih a: Pathian i ni lo vem ni? Hun kal tawhah khan min pui lo vem ni? I thawk leh dawn lo vem ni?

Harsatna avangin i chau tawngkhawng a nih chuan, Pathian i mamawh a ni. Nimahsela i Pa chu i ṭawngṭai avang khan engkim pe tur che a ni tihna a ni chuang lo. Pathian chuan amah fak phawt a duh a ni. I faknaah chuan a ṭhatna avangin lawmthu sawi ang che. Tichuan, ṭawngṭaiin Pathian ṭanpuina dil ang che.

Jehoshaphat-a chuan rinawm takin Pathian a fak a, ṭanpuina a dil a. Pathian chuan hmelma lak ata a chhanchhuak a ni. Chutiang chiah chuan Pathianin a pui ve ang che.

Ngaihtuah zui atan

* Pathian chu i harsatna hmachhawn aiin a lian zawk tih hriat hian engtin nge i harsatna tawh mekah a puih theih che?

* Beisei neia ṭawngṭaina chu eng nge ni? Pathian chungchanga zawhna pathum (Pathian i ni lo vem ni? Hun kaltawhah khan min pui tawh lo vem ni? Min pui leh dawn lo vem ni?) hian i ṭawngṭainaah a puih che?

* I ṭawngṭaina Pathian a chhang lo che a nih pawhin, engtin nge hrisel takin, Isua angin i hmachhawn ang?

*Khawiah nge i chatuan hmun i hman dawn?*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chuti lo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*