PATHIAN CHU A CHAK LAM, I LAMAH A ṬANG

_I Mamawh Tawpkhawk Pathianin a Pek Dan Che_

— Rick Warren 

— July 17, 2024

“Mi chu zozai, mi rawn bei tura lo thawkte chu han bei thei ziazang kan ni si lo va, a tih ngaihna reng reng kan hre bawk hek lo, i lam kan lo hawi mai zawk a ni e.” 2 Chronicles 20:12

I hah rimtawng a nih chuan, Pathian hnena tawngtaia, mahni chak lohna leh tlakchhamte thlen hi a pawimawh hle. I hlau a nih chuan, tlang takin a nihna tak chu Pathian hrilh ang che.

2 Chronicles 20:12 a Jehosaphat-a tawngtaina kan hmu, “Mi chu zozai, mi rawn bei tura lo thawkte chu han bei thei ziazang kan ni si lo va, a tih ngaihna reng reng kan hre bawk hek lo, i lam kan lo hawi mai zawk a ni e.” Chutiang rilru pu chuan i awm tawh em? In nupa inkarah emaw, i hna leh thil dangah hrehawm ti takin i awm tawh em? Kartir lamah chuan chinfel theih i inbeiseia, nimahsela Nilaini a lo thlen meuh chuan chakna reng i nei ta lo va.

Chutiang chiah chuan i awm tawh em? Chanchinbu i chhiar a, mi thalo zawk nia i hriatte chu a chak lam zawk chan an chang angin a lang lehnghal. Kan rilru sukthlek leh kan khawtlang nun chu tluchhia ang maiin a lang ta. Mi thalo zawkte chu chan tha zawk chang angin an lang bawk si.

Engtin nge i tih tak ang le? Hetiang hian i dinhmun chu chiang takin Pathian hrilh rawh, “Lalpa, theihna reng kan nei lo va, tih tur ber pawh kan hre lo tiin.”  

Chang 12-na leh chang 6-na han khaikhin teh, ngaihnawm deuh a nia, chang 12 ah chuan “tihngaihna reng a hre lo va” chang 6 ah erawh thung chuan Jehosaphat-an hetiang hian a sawi a, “I kutah chuan thiltihtheihna leh chakna a awma, tuma chelh rual i ni lo va.”  2 Chronicles 20:6.  Nang chu chak lo mah la, Pathianin chakna a nei a ni. Amah i rin chuan a ngaihsak ang che.

Chakna ka neih a ngai lo. Nang pawhin i neih kher a ngai lo. Nei awm ang deuha i awm pawh a ṭul lo. I tih tur awmchhun chu thiltitheihna zawng zawng neitu Pathianah rinna nghat ang che. 

Ngaihtuah zui atan

* I lo puitlin hnu hian, engtin nge chak lohna hmachhawn dan an zirtir che?

* Eng vangin nge kan tlakchhamna hi mi dang hnenah, Pathian pawh tiamin,sawi a harsat thin em em?

* I la chak loh lai khan Pathian hnathawh engtiangin nge i lo hmuh tawh le?

*Khawiah nge i chatuan hmun i hman dawn?*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chuti lo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*