Sawrkara ka awm ve lai khan MOU Draft kan thawn a, Central lam khu an ngawi hmiah a ni

Aizawl | July 12, 2024: Vawiin ni 1, July, 2024 hian Congress Party chuan Congress Bhavan-ah ‘Friday Political Session’ an hmang a. He hunah hian MPCC Sr. Vice President Pu Lalnunmawia Chuaungo chuan thu sawiin, “Union Home Minister in ‘Assam Riffles te sawnna tur MOU ziah tawh kar khat chhunga chinfel tum a ni tiin a rawn thawn’ an ti a, ka rilru khawih deuh a awm a. Sawrkara ka awm ve lai khan MOU Draft kan thawn a, Central lam khu an ngawi hmiah a ni. Chutih lai chuan anmahni lam hian MOU tur lam hi an lo siam ve a, mahse ziakin min pe lova, an draft ang chuan Loch House te, Quarter Guard leh Mandir te hi chhuahsan an tum lo niin a lang a. Mizoram sawrkar atang chuan reminder AR leh Ministry of Home te kan thawn thin a, chhanna kan hmu ngai lo a ni.

“July ni 4 khan CM hova sawiho a ni a, hetah hian Minister 4 laiin an tawiawm laiin AR lam atang chuan IGP a tel a ni. IGP level nena sawiho tur chuan Chief Secreatry chin nena sawiho tur a ni a, a Protocol a awm a, sawrkar fuction ah thil pawimawh a ni. Hetih lai hian CM chuan amah tawiawm tura Minister 4 Assam Riffles IGP dawr tura a hruai te hi tihdanphung a ni lo a, Mizoram sawrkar an timualpho a ni. Sawrkar anga indawrna ah IGP level Chief Secretary khan a lo dawr tur a ni a, chu chu international level thlengin an tihdanphung a ni. Kan Chief Minister pawh ka hrilh duh chu, a hnuaia office te dinhmun hetianga an tih hian a tihniam a ni.

“Union Home Minister in MOU hi a ram neitu Mizoram mipuite rawn lova a rawn finalise tur hi a dik lo a, sawiho a, State sawrkar nen an siam tur a ni. Mizoram sawrkarin acre 1007 lai a pe a, Assam Rifles ten an luah sa mek hi acre 60 vel chauh a ni. Sawrkara ka awm ve lai khan Inchi khat pawh in chhuahsan turah hian in chang zui lovang tih kha ka hrilh dan a ni. Chuvang chuan an MOU lo siam ve pawh min thawn lo an nih ka ring.

“Hemi chungchang hi Mizoram interest a ni a, mipui interest a ni. Helai a Loch House te, Quarter Guard leh Mandir te hi an chhuahsan duhlo anih chuan chhuaklo mai se tih hi ka chah duh a ni.” a ti.

Pu R. Vanlalvena, General Secretary leh Ex-MLA pawhin thusawina neiin, “Congress party hian hruaitu tha kan nei hi a lawmawm a, Assembly house thlengin min kaihruai a ni. Tuna sawrkar lai hi chu Assembly House chhungah a then an nalh em em a, a then lahin kuhva leh Sahdah an hmuam tun tun mai anih hi. Home Minister berin, ‘Jail tang ten nula an rim a, an haw leh mai thin’ tia a sawi te khan a chhiat nge, tunlaia kan hriat lar Jail tang tlan chhuak an awm ta zeuh zeuh mai a ni. Hmani lawkawh Sawrkar man sa kuhva ro bag sang nga chuang bo te kha, Truck tam takin a phurh ngai ani a, an thawm a rin tehlul nen a bo thei hi a mak a, kan Home Minister hi a hausa tawh viauin ka ring.” a ti.

Pu S. Lalrinawma, Secretary, MPCC pawhin thu sawi in, “MP inthlanah khan Christian State ah hian BJP, Christiante mit naute dektu te dodaltu Congress min thlang tling lo kha a mak a ni. Nagaland ah te, Manipur ah te leh Garo ho te chuan an thlangtling a. Mizoram mipuite pawh hian ngaihtuahna kan hman a, uluk taka kan hruaitu kan thlanchhuah ve a ngai a ni.” a ti.

He Friday Political Session hi Pu Lalroenga, General Secretary, MPCC chuan a kaihruai a ni.