NEXA GIG Motors MBA Official Championship / H. Lalrinhlui Women's singles Champion naupang ber

NEXA GIG Motors MBA Official Championship 2024 (Junior & Senior), Dt 25. 6. 2024 atanga Dt 6. 7. 2024 chhunga neih chu Inrinni khan ropui taka khar a ni. H. Lalrinhlui chuan Women's singles inelna huangah Champion thei naupang ber record thar a siam

Junior category (Under-11 atanga Under-19 inkar) bik hi Dt. 25-29. 6. 2024 chhung khan neih a ni a. Senior category bik erawh Dt. 2. 7. 2024 atang khan tan a niin, Dt 6. 7. 2024 (Inrinni) khan a hmawr bawk a ni.

NEXA GIG Motors MBA Senior Official Championship 2024-ah hian Chanmari West a khawsa, Chanmari Shuttlers Club (CSC) tana khel, H. Lalrinhlui chuan Women's singles inelna huangah Champion thei naupang ber record thar a siam a. Zoramthari Renthlei, Champhai Vengthlang, CSC tana khel tho chu Women's doubles-ah champion in, MBA Official Championship leh ranking tournament-a category hrang hrangah champion thei naupang ber a rawn ni bawk. Heng bakah hian record thar hrang hrang siam a ni tel bawk a ni. Tin, inelna ngaihhlut hlawh ber leh pawisa fai tamna ber, Men's singles-ah Saitluangpuia Sailo, Ramhlun Venglai, Sihphir Badminton Club tana khel chu a vawi hnih nan champion a rawn ni leh thei bawk.

OFFICIAL CHAMPIONSHIP IN NGAIHHLUT A HLAWH

Kar hnih awh Mizoram level-a badminton inelna lian ber leh ropui ber hian ngaihhlut a hlawh hle a. Junior category lam ah player 215 in tournament an khel a, senior lam ah player 97 zet an in lan thei bawk. Match awm zawng zawng zat hi 367 teh meuh a ni.

TATA Trusts (NEIDA) leh MBA thawhhona avanga hmun hrang hrang Academy tha a awm te pawh he tournament khel tur hian an rawn haw khawm a. Mizoram level badminton tournament-ah chuan a lian ber leh sum sen hnem na ber a ni tel bawk.

A vaiin category 21-ah inelna kalpui a niin, hengah hian lawmman la phak te tan pawisa fai, trophy leh certificate pek an ni a. Junior category bikah Semi final lut chin te tan lawmman pawisa fai siam a niin, senior inelna ah phei chuan quarter final lut chin in an dawng vek a ni.

Record thar neitu Rinhlui leh Thartei

NEXA MBA Official Championship 2024 a hming langsar ber chu H. Lalrinhlui, CSC leh Zoramthari Renthlei, CSC te hi an ni awm e. Rinhlui hi kum 15, thla 1 leh ni 12 a upa a ni a. MBA Official Championship-a champion thei naupang ber nihna lo kawl tawhtu, Abigail Lalthazuali record a rawn khum a ni. Rinhlui hian final-ah tun tournament-a category pathum a final lut thei awmchhun, Ramngaihzuali, Ramhlun South, CSC tan tho a khel chu deciding game-ah 14-21, 21-12, 21-16 in a hneh a, a vawikhat nan Senior Official Championship lawmman pakhatna a la. Final-a a hneh tak, Zualtei hi kum 17 chiah a upa a la ni a, MBA tournament hrang hranga Women's singles champion thei naupang ber nihna kawl mek tu a ni nghe nghe. Nikum hmasa lamah kum 15 leh thla 6 mi nia Siaha Ranking Tournament-ah record a lo siam tawh erawh Rinhlui hian a rawn thaireh tel a ni.

Tin, Zoramthari Renthlei hian Women's doubles-ah Zualtei nena inkawp in, Rinhlui leh TC Lalthazuali te tangdun chu 21-14, 21-16 in an hneh a, champion thar an ni bawk. Thartei hian kum 14 a pumhlum chiah a, senior category hrang hranga MBA Official Championship bakah ranking tournament-a champion thei naupang ber record thar a rawn siam bawk a ni. Rinhlui leh Thartei te hi TATA Trusts (NEIDA) leh MBA thawhhona a PGBA, Hyderabad -a training nei mek an ni nghe nghe.

A vawi hnih nan Saitluangpuia

Kum 16 leh thla 10 mi niin nikum hmasa khan MBA Official Championship-a mipa lam inelna ah lawmman pakhatna la thei naupang ber nihna record a rawn siam a, nikum lamah H. Lalthazuala'n a rawn khum leh tawh thung. Kumin ah Saitluangpuia Sailo hun a rawn in herchhuak leh ta a, harsatna lian tham tawk loin Men's singles champion a rawn ni leh thei. Tluangpuia hian quarter final-ah deciding game a khel tih loh chu straight set vek in hnehna a chang a, final-ah pawh Laldintluanga Tlau, Bawngkawn BC nen intum in, 21-8, 21-17 in a chak a ni.

Result hrang hrang leh record thar

Badminton tournament-a mipui mit ti tlai ber thin tu chu Men's doubles hi a ni awm e. Tun tum final pawh a hmuhnawm hle a, an in nawr tawn zak zak hnu ah Joseph VL Ringngheta, Mission Veng BC leh C. Lalramzauva, Bawngkawn BC te tangdun chuan 21-12, 10-21, 21-13 in Lalrinawma leh Laldintluanga Tlau, BBC te inkawp chu an hneh, a kum zawn in an champion. Tin, Mixed doubles inelna huangah veteran player, R. Lalbiaksanga, Mizoram Police BC leh Lalduhzuali, Durtlang BC te tangdun chuan Vanlalpekhlua Sailo, Chaltlang BC leh Ramngaihzuali, CSC te tangdun chu 22-20, 21-12 in, straight set in an hneh bawk. BS-a leh Duhzuali te tan official championship-a an vawikhat champion-na a ni a, a lawmawma danglam hle ang.

He Championship-ah hian record hrang hrang siam a ni bawk. MBA Official Championship khel thei naupang ber record chu kum 12 mi niin K. Lalrempuii leh Lydia Lalnunfeli, Saron BC ten an siam a, women's singles leh doubles category-ah an in lan ve ve. Tin, kum 56 mi niin, Dr Malsawmkima (Masky), Mission Veng Badminton Academy chuan Official Championship khel thei upa ber record thar a siam bawk. Men's doubles category huangah a fapa nen an in lan a ni.

Result kimchang:

Men's Singles:

Champion: Saitluangpuia Sailo, SPBC

Runner up: Laldintluanga Tlau, BBC

Women's Singles:

Champion: H. Lalrinhlui, CSC

Runner up: Ramngaihzuali, CSC

Men's Doubles:

Champion: Joseph VL Ringngheta, MBC & C. Lalramzauva, BBC

Runner-up: Lalrinawma & Laldintluanga Tlau, BBC

Women's Doubles:

Champion: Ramngaihzuali & Zoramthari Renthlei, CSC