MZP-in July 31 ral hmaa zirlaite hnena zirlaibu thlen kim phut

Aizawl | July 23, 2024: Mizo Zirlai Pawl (MZP) General Headquarters, Aizawl chuan July 31, 2024 (Nilaini) ral hma ngeia zirlaite chanvo a thlawna zirlaibu dawn tur an dawn kim a phut a, zirlaite'n an chanvo an dawn kim loh chuan na taka hmalak a rel.

Mizo Zirlai Pawl (MZP) General Headquarters, Aizawl Executive Committee meeting vawi 632 (2023-2025 term-ah vawi 10) na chu vawiin chawhnu dar 1:00 khan MZP Conference Hall-ah neih a ni a. Zirlaibu a thlawna sem tur la sem zawh loh chungchang, Assembly neih hun tur chungchang leh pawl chhung thil pawimawh hrang hrangte rel a ni. Meeting hi MZP Vice President Pu C. Lalremruata'n a kaihruai.

MZP Executive Committee Meeting thurelte :-

1. MZP chhungkua, Hnampual hruaitu, college SU leaders, MZU Students’ Council leh Students’ Bar Council hruaitute hlawhtlinna changte lawmpuina hun tur atan ni 6th August, 2024 (Thawhlehni) ruat a ni.

2. MZP rorelna sang ber (Assembly) vawi 68-na Tlangsam khua, Champhai District a neih tur chu a hun atan ni 24th - 26th September chhunga neih tura rel a ni.

3. Zirlaibu a thlawna sem tur la sem zawh loh chungchang Ni 3rd June, 2024 (Thawhtanni)-a MZP Executive committee meeting-in hmalak nise tia alo rel tawh, hmalakna kal zelah RTI hmangin school 1270 la dawnglo tih hmuhchhuah a ni a. Pu F. Rodingliana Printing & Stationery changtu minister chu a pisa a hmuh alo ni tawh bawk a, Education Dept. changtu Minister pawh sawipui tura hmuh tum niin, hmuh theih a nilo leh chingfel dan kawng zawng vat lo a sawrkar hmasa dem zawng ringawt a tawngkam a nei chu MZP chuan hriatthiam har a ti hle.

Meeting chuan, ni 31st July, 2024(Nilaini) ral hma ngeia zirlaite chanvo a thlawna lehkhabu dawn tur an la dawng kim lo a nih chuan na taka hmalak nise tiin a rel a ni.

MZP General Headquarters hruaitute chuan, vawiin vek chawhma dar 10:00 khan Zomuantlang khua Tripura nen a kan in ri na hmun a chhungkaw 13 ration card delete sak chungchangah Pu B. Lalchhanzova, Minister Food, Civil Supplies & Consumer Affairs chu a pisa ah hmuin, Minister chuan a tul anga zirchianna neih a nih tur thu leh Myanmar, Manipur leh Bangladesh-a kan unau raltlan mi 45000 chuang tana buhfai an dawn theihna tur central atanga cheng vbc. 5 kan dawn thu a lo sawi a. MZP hruaitute chuan kan unau raltlan ngaihtuahtu sawrkar chungah lawmthu a sawi a ni.