- Lallenmawia Jongte
Krismas dawn hnai tawh tak a ni a, Millenium Centre sir, Bara bazar pan thlakna tur epa ṭhutnaah chuan ngawi rengin ka ṭhu a. Ka sir maiah chuan Chhamdamna Sipai Pawl (Salvation Army) band rual chuan tawtawrawt thiam takin an ham ri ruai ruai a.
"Khawvel lawm nan a lokal a,
Leiin a lal lawm se;
Thinlung tinin hmun lo kian se,
Lei leh van zai rawh se,
Van leh khawvelte zai rawh se," tiin.
Khua a tlai lam viau tawh a, mi chu an phu suau suau a. Programme pawimawh tak nan hman loh hlau niawm takin an inpel suau suau a.
An tawtawrawt hamna sirah chuan bawm an hung a, chu chu Red Kettle an tih a ni a, chu bawmah chuan a duh duhin riangvai leh chanhaite tan, an phal ang ang pawisa nawi an thlak ṭhin. Sipai Pawl hian Krismas dawn apiang hian hetiang hian hmun hrang hrangah an ti ṭhin a. An pawisa hmuhte chu riangvaite tan an hlan ṭhin a ni.
Chu Red Kettle bula Sipai Pawl thuam var mawi taka inthuam nula nalh zet chuan thinrik a thing a. Bawma pawisa thlak apiang chu lawmthu a lo hrilh zel bawk a.
Kei hi, Millenium Centre-a ka nupui bazar nghak a ṭhu khawmuang ve mai mai ka ni a. Hmeichhe bazar zui ninawm zia te, an lei duh lem loh tur pawh engtia uluk deuh deuha en zel peih nge an nih tih te, miin an phalna tawka an zuar ni na na naa tlawm chiam an tum kher te chu e'nge a ṭulna aw, tih te ka ngaihtuah mai mai a.
Chu nula thinrik thing, tuaino zet chu hmuhnawm ti takin ka thlir leh ṭhin a.
Chutih lai chuan nu, la valai angreng tak, shawl uk bat chuan chu bawmah chuan Rs 100/- hi a rawn thlak a. A pawisa thlak zat ka hriat chian em em chhan hi, bawma a thlak dawn a a thlau vang a ni. A bazar bag sen khai lian deuh leh a inthuamna en chuan a hausa lo tih a hriat mai a. Tin, a chapal bun pawh a ṭhing!
A pawisa thlak zo rawn hawi let chuan a shawl baha a mit a hru zauh chu ka hmu a.
Ka ṭhutna thir thlutthleng kiang, kawngsirah chuan a rawn ṭhu tung a. A ṭap nia ka hriat avangin thinrik thing nula ai mah chuan ka mit a la ta zawk a.
Ka en reng a. A shawl chuan a mit a hru leh ṭhin a.
"Ka pi, puih theihna che ka nei em?" inti hawihawm tak chuan ka ta ti ṭhuai a.
"E aw a... puih ka ngai love, ka lawm e," a ti bah nak a.
A shawl chuan a hmai a tuai thuak thuak a.
"Bawma pawisa i thlak aṭanga khan ka lo en reng che a, I ṭap ni tlatin ka hria a..."
"A ni maw! Ṭap tihah ka thinlung a hlim em a ni!"
Ka ṭhutna aṭang chuan thovin a bulah chuan ka zu ṭhutung ve ta a.
Kan inbe lumlam nual a. A piah dawra coffee machine ami coffee chu ka va la a. Kan in duh ta a. Ṭhir thutthleng awlah chuan kan ṭhu dun ta a.
Sipai pawl tawtawrawt ri dam diai karah chuan a thinlung hlim chhan chu min hrilh ta a:
"September thla mai khan Sipai pawl fahrah enkawlna hmun, Muanna In, aṭangin ka fate pahnih ka la chhuak a. Enkawl thei lo dinhmunah kha chen ka ding a. Tunah chuan leirem te rap chho ve mekin ka fate ka enkawl ve thei ta a, ka hlim em a ni. Sipai Pawl hla rem khan min hneh a, kan nufaa kan nunkawng min ngaihtuah chhuah tir a, ka hnuk a lo ulh ta mai a nih kha.
"Chuvang a nia, Sipai pawl ni ve lo mah ila an hmalakna hi ka kal pel mai thei ṭhin lo," a ti a.
Heti hian a chanchin tawi min hrilh zui a:
"Sialsuk khuaah chuan khawsa thei pawl ni chiah lo mah ila, kan rethei bik lo. Ka pa hi kan Middle Sikulah peon a ni ve a. Sorkar hnanghet nei ve ta chu mite kan awt em em bik lo... a a sei lutuk dawn e, a tawi zawngin sawi ta ila...
"Aizawlah hian ka naute nen In luahin kan khawsa ṭhin a. Kan ṭhenawm maia inluah ve tho, College zirlai nen chuan kan lo in hmel duh a. Ka chhungte remti lo chung kan innei a. Kum 20 awrh ka nihin pasal ka nei ta a ni.
"Ka pasal chuan min hmangaih emaw ka ti ṭhin a, mahse, min hmangaih lo. Ka mawina leh ka itawmna mai kha a duh a lo ni a. Fa pahnih kan neih hnuah kei aia khawsa thei a tawng a. Min chhuahsan a. Kan fate pawh a ngaihsak zui duh lo. Kei chu thuhran, a fate pawh hmangaih zui lo kha a chanchin pawh ka hre zui peih lo ve...
"Ka duh emaw duh lo emaw, ka tlin emaw tlin lo emaw ka fate enkawl chu ka kutah a lo awm ta a. Khang lai khan Mawitea hi kum 7 mi a ni a, a nau Hruaitea hi kum 4 mi a ni.
"Ka nuin min boral san a, ka pain nupui dang a nei bawk nen, In lama kir leh chu ka tan tin ngam chi rual a ni lo a. Kan khua Sialsuk pawh ka mangṭha hlen ta a. Kan nih nihin kan ni ve chawm mai ang chu. Ka fate enkawl chu ka bat a ni a, puitling takin ka enkawl bawk ang.
"Nutling ni turin ka bei a, fate tana chenfakawm nih kha ka tum ber a ni ṭhin.
"Kei leh ka fate tan beiseina sang tak ka neih laiin eng kan ang thei ta lo a. A nupui hlau chung chunga ka pain bul min ṭan sak ka dawrte a tlachhia a. Kuthnathawka inhlawh ngawtin ka fate ka chawm thei si lo.
"Ṭhiante puihna zarah ka fate pahnih chu fahrah enkawlna hmunah ka dah ta ringawt a. Ka rilru a na asin! Fate enkawl zo lo nu nih chu. Ka tal talin ka tal a, rim takin, theih tawp chhuahin ka bei a.
"Muanna In Boys Home-ah khuan naupangte hi kum 20 an tlin thleng bak an aw thei lo a. Kum 20 an tlin hma ngeia kan nufaa bul ṭan thar turin ka bei ngawrh asin! Hei kum 10 dawn a vei hnuah chuan ka fate enkawl thei dinhmunah ka ding ve leh ṭan ta a. Kum tam tak hnuah ka fate nen Masi kan hmang ho ve thei dawn ta a. Ka hlim em a ni," a ti ta a.
A mittui lo hnam thar chu a hru a, a nui seih a. "Ka hlim em a ni," a ti nawn leh a.
"Ka fate nei let leh tura ka beih lai khan Pathian duh loh zawng ka ti miah lo a nia aw... Pathian hrereng chungin rim takin ka thawk a ni" a ti leh a.
"Heti hian bazarah sa zuar ho bawngsa sale ka lei haw ang a, ka faten nghakhlel takin min lo nghak dawn a. Hei en teh, ka bazar bag-ah hian an thawhnaw thar tur ka lei sak a awm nual bawk asin!" a ti a.
Muang changin a ding a. "Ka titi tui ta phian mai, ka kal dawn. Ka faten min nghakhlel tawh ngawt ang. Chaw ei tui aw."
"Chaw ei tui le. Ka pi tunge ka hming i tih kha?"
"Sangte, min ti mai rawh."
Khua pawh a lo thim lek lek tawh a. Kan nu bazar zo chu Millenium Centre aṭang chuan a rawn thleng ve chawp chilh a.
"Ka rei em?"
"Rei lo"
"Rei lo à. Nidanga rei min theih nen"
"Ka hlim em a ni."
Ka bike dahna panin kan inzui ta hnak hnak a.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: