Mizo hmeichhe International footballer hmasa ber Chawii

- Hmingsanga

Mizo ten hmeichhe football a International player kan neih hmasak ber chu Lianbawia leh Lalzauvi te fanu, Vanlalchawii a ni a. Kum 1963 april ni 25 khan Khawpuibung, Churachanpur ah a piang a. Veng leh veng inkhelh atanga bul tanin, District aiawhin, chumi hnuah Manipur aiawh a khel chho ta zel a. A vanglai chuan Manipur hmeichhe football team chu Vanlalchawii tel lo chuan an kal meuh lo a tih theih awm e. Khatih hunlai leh vawiin ni thlengin, hmeichhe football ah na na chuan India ram hi Manipur in an awp hneh chiang hle a. India team ah pawh an tam ber deuh ziah. Chawii hian 1979 - 1985 bawr vel thleng khan Manipur leh India aiawhin a zin chhuak deuh reng a tih theih awm e. Inkhelh a chawlhsan dawn hnaih lam 1984 bawr velah Manipur sawrkar Sports & Youth Services hnuaiah Physical Education Teacher hna a nghet loin a thawk tan a. Hna nghet mumal theih loh avangin, Mizoram lamah a rawn chhuang chhuak a. LAD Department hnuaiah LDC hna muster roll in a thawk leh a. Mizoramah pawh a inkhel chhunzawm a. Khatih hunlaia hmeichhe football inelna hrang hrangah a hming a chher hman leh viau!

Kum 1985 - 86 inkar khan Mizoram sawrkar tirhin NIS, Kolkata atangin Diploma in football coaching a zo a. Mizo hmeichhe zingah Football coach zir zo hmasa ber a ni nghe nghe . A training zawh hnu hian Mizoram sawkar pawhin chhawr zui tumin hma a la chho zel a, a dinhmun tur a tifel hman tep tihin, vanduai thlak takin, may ni 24, 1989 khan Churachanpur ah a boral zui ta hlauh a. Chawii hian 5th Inter Zone Football Championship 1979 a khelhah Best player leh top scorer lawmman te pawh a lo dawng tawh a. England atanga hmeichhe football team Manipur tlawh a zin Tiverton Ladies Football team Manipur in an hmachhawn tum pawh khan a tel ve nghe nghe. India ram chhung a chetthatna hrang hrang sawi tur tam tak a nei a. India ram pawn lamah pawh a che tha chhunzawm zel a. India hmeichhe football team in South East Asia a tour an neih tum pawhin Thailand, Malaysia leh Singapore te an tlawh a, hemi tum hian India tana goal khung hnem ber a ni. Kum 1981 khan International Womens Football Cup ah India aiawhin Taipei, Taiwan te pawh a kal tawh bawk. Chawii hi nula lian lo tak ni mahse India ram hmeichhe football ah chuan a hun lai a 'nulian' ber pawl a ni awm e.