KHAWIAH NGE BEISEINA TAK TAK A AWM?

_I Mamawh Tawpkhawk Pathianin a Pek Dan Che_

-  Rick Warren 

-  July 3, 2024

“Thlarau Thianghlim thiltihtheihna zarah beiseina in nghah theihna turin, beiseina Pathian chuan in rin avangin, lawmna leh remna tinrengin tikhat che u rawh se.” (Rom 15:13)

Indopui pahnihna a tawp tak avang khan, US indo lawnglian chuan Virginia lawng chawlhhmun a rawn pan ve leh ta a. Chutia a lo kir mek lai chuan lawng chu a pil ta tlat mai a. Coast Guard-te chuan lawng a mite chu chhanchhuah tumin an bei a. Chutia chhanchhuak tura an beih lai chuan, lawngpu chuan morse code hmangin thu a rawn thawn a, chu a thu rawn thawn chu: “Beiseina a awm em?,” tih hi a ni.  

Chu zawhna chu hringnunah hian zawhna pawimawh tak a ni: Beiseina a awm em?

Mi sang tam takin nitin chu zawhna chu an zawt a:

* Daktawr hnena inentirin test result a nghah laiin a zawt thin

* Nupaa a thla tela counseling kalten an zawt thin

* Sum leh paia tlakchhiat dawn hnaiah accountant hnenah an zawt thin

* Naupang bo an zawnnaah chhungkuain an zawt thin

Chaw tel lovin ni 40 leh tui tel lovin ni thum chhung i nung thei a. Boruak tel lovin minute riat i nung thei a. Beiseina tel lo chuan second khat pawh i nung thei lo a ni. Nunna atana thil pawimawh ber te zinga mi a ni. Beiseina ber a bo tawh chuan, nun hi a tawp mai thin. 

Tunlaia kan beiseinate hi a va chhe ta em, miin innghahna tlak lo vah beisei an nei tlat thin a lawm. Beiseina dik lo vansang chanchin zirnate, bank account ah te, dam thuaina te leh eizawnna nghetah nge beiseina kan nghat thin. Chung beiseina dik lo chuan min tilungngai thuai thin. Beidawnna hian dik tak chuan kan nun a tichhe ber zawk a ni.   

Beiseina tak tak chu khawiah nge i hmuh tak ang le? Bible chuan Pathian lam hawi rawh min ti a ni. 

 Bible-in Rom 15:13 ah chuan, “Thlarau Thianghlim thiltihtheihna zarah beiseina in nghah theihna turin, beiseina Pathian chuan in rin avangin, lawmna leh remna tinrengin tikhat che u rawh se,” a ti a ni.

Pathian chauh hi hnualna tur ni lo beiseina min petu a ni. Amahah rinna i nghah chuan, hlimna te, thlamuanna te leh beiseina te a luangchhuak ang.

Chutiang beiseina chu i mamawh a ni.  

Pathian chu a awm reng a. I hun kal tawh, tun hunah leh hmalam hunah pawh a awm a ni. Hun thaah i kiangah a awm a. Hun tha lo vah pawh i kiangah a awm a ni. 

A ni chu khawi hmunah pawh a awm a. Nangmah chauhin i awm ngai lo. Pathian awmna apiangah beiseina a awm ṭhin.

Ngaihtuah zui atan

* Engtik hunah khan nge Pathianin a awmpui che tih i hriat theih miah loh?

* Pathianin a awmpui reng che tih i hriat hian harsatna hmunah engtin nge beiseina a pek che?

* Engtin nge mi hnenah Pathianin min awmpui reng a ni tih i hrilh nawn theih ang?

Hnualna tur ni lo beiseina min pe thei khawiah nge i hmuh ang?

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theih nana Pathian thutiam chu ring turin i inpeih em? I inpeih a nih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i angchhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

*[Lettu : Sangpuia]*