Charity Match Sum hlan an ni

Tunhnai Aizawl leh a chhehvela khuarel chhiatna tuartu chhungkaw engemawzat hnenah Mizoram Football Association (MFA) leh Mizo Professional Footballers' Association (MPFA) chuan zanin khan Charity Football Match atanga an sum hmuhchhuahte an pe chhuak. Hyve Aizawl City Hall, Aizawl ah he hun hi buatsaih niin, chhiattawk chhungkaw aiawh leh khawtlang hruaituten sum fai hi an dawng a ni.

Tanpuina sum hlanna inkhawm kaihruaitu, MFA Executive Committee Member Tv. Hmingthansanga'n chhiat tawkte chanhai tur zia, thawklehkhata chhungkaw tam tak khawvel a inher danglam thut dan, a hrehawm tur zia, a rapthlak zia leh a hrilhhaithlak tur zia rawn sawiin, Mizoram Football Association leh Mizo Professional Footballers' Association ten an theihna zawna tanpui ngaite tanpui tura pheikhairuala thawhho zai an rel thu thiam takin a sawi hawng a.

MFA Executive Committee member dang Pu Hmingthansanga Zadeng rawn ding chhuakin, Bible chang pahnih a rawn chhiar a, chhiat tawk chhungkuate thlamuanna thu felfai takin a rawn sawi a, khunkhan takin a tawngtai bawk.

MFA Honorary Secretary Pu Lalrengpuia rawn ding chhuak lehin, MFA Executive in Charity Match buatsaih a rel dan te, MPFA te nena thawhho dan ngaihtuah a nih zui dan te, a buaipuitu tur bik Committee din a nih dan te leh phungbawm atana pawl leh midang sawm zui an nih dan te fiahfai takin a rawn report a. Charity match hlawhtlinna atana mite hriat hlawh, media hrang hrang hmanga mite hip khawm thei tur an sawm khawm dan leh, an mi sawm ten an theihna leh thiamna an lo ui lohzia, MFA chhungkuaa mite ngei ngei pawh a sulsutu an nih zia te kimchang takin a rawn sawi a. He charity match hlawhtlinna hi a buatsaihtu MFA te ni lovin, Mizo mipui, inkhel en an tum lo chung pawha tanpui duhna rilru pua an sum leh pai rawn thawhtute leh professional footballers bakah All-Star team, an hun hlu tak senga rawn pen chhuakte an nih thu a sawi.

Lallianzuala Chhangte, MPFA ziaktu lian rawn ding chhuak lehin - tun tum charity match hi Mizoram a charity match khelh tawh azawnga hlawhtling ber ni hiala a hriat thu te, khelmual chhung leh pawn lama rim taka thawkte thahnemngaihna chu malsawma a awm thu te sawiin, Kristiante vanneihna chu kan natna leh kan tuarnaa tel ve Pathian neitu kan nih hi a ni, tiin a tuartute hnemna thu a sawi bawk.

Charity Match atana cheng tam tak rawn thawhtu, GIG neitu Pu John Lalpeka pawhin thu sawiin, Mizo mipuiten chanhai zawkte tanpuina atana sum tam tak an rawn thawh chu lawmawm a tih thu leh, anni pawh sumdawng an nih anga, an hnêna sum rawn petute chu an phaktawk ang tein, an mamawh huna an pêk lêt ve mai thu a sawi.

Nl. Arini Ralte in thiam leh lungkuai takin fakna hla pahnih a sa bawk.

MFA leh MPFA te buatsaih Charity match atanga sum hmuhchhuah Rs. 13,90,000/- chu Cyclone Remal tuartute hnenah zanin hian pek chhuah a ni a, Chief Minister's Relief Fund ah Rs. 2,13,950/- chhun luh leh tura ruahman a ni bawk.

MFA leh MPFA te hian Mizo milar leh chhuanawm tak tak All-star team pahnih te nena tanghovin, phungbawm atan sumdawngte leh pawl dang engemaw zat  sawm khawm an ni. June ni 21, 2024 Zirtawp zan khan Aizawl Mualpui a Rajiv Gandhi Stadium-ah Charity Football Match huaihawt ani a, mi singtelin a hmunah inkhel an en a; he inkhelah hian Mizo Milar te, ISL leh I-League a Mizo player thiam tak takte an inlan a ni.

Sum pekchhuah dan te:

Pu Matthew Lalchhanhima (Aibawk) te chhungkaw ralna - Rs 80,000

Pu Lalthanzama (Falkawn) te chhungkaw ralna – Rs 80,000

Pi Lalnunziri (Kelsih) ralna – Rs 40,000

Pi Lalrimawii (Lungsei) ralna – Rs 40,000

Pu Laltanpuia (Salem Veng)te chhungkaw ralna Rs 1,20,000

Pu H Lalrinmawia (Hlimen) te chhungkaw ralna Rs 80,000

Pu R Muanzova (Hlimen) te chhungkaw ralna Rs 1,20,000

Pu Lalduhthlanga (Melthum) te chhungkaw ralna Rs 2,40,000

Pu Lalremtluanga (Melthum) te chhungkaw ralna Rs 2,40,000

Hlimen Branch YMA Rs 2,00,000

Melthum Branch YMA Rs 1,00,000

Republic Veng Branch YMA Rs 10,000

ITI Veng Branch YMA Rs 10,000

Kanan Branch YMA Rs 10,000

Kulikawn Branch YMA Rs 10,000

Pu Lalsangzuala Hmar (Football Coach) te chhungkua Rs 10,000