inremna atana lalthutthleng ken hi inpekna vawrtawp atang lo chuan a theih loh

Aizawl | July 1, 2024: Vawiin ni 1, July, 2024 hian Congress Party chuan Congress Bhavan-ah ‘Remna ni champha vawi 38-na lawman programe’ kan hmang a. He hunah hian Pu Liansuama, President, Former Legislators Association of Mizoram chuan thu sawi in, “Remna atan kan hotute khan an thawkrim hle a, tuboh leh dolung inkara awm ang an ni a, thing leh raw innawh laiin, ring rawlh tak meuh in hma an lo la thin a ni. Central lama kan hotuten Pu Hawla’n CM nihna a kian dawn a tih khan mak an ti a, inremna atana lalthutthleng ken hi inpekna vawrtawp atang lo chuan a theih loh a ni. Kan hotute kha anmahni an inhlan a, mellung pawimawh tak an phun a ni.

“Remna hi Kohhran te leh mizo mipuite tawngtaina rah a ni a. Remna alo thlen theih nan kohhran, YMA leh MZP te hian hma an la vek. Khatih hunlai khan Chief Minister Pu Lal Thanhawla, kei, Pu Rokamlova leh Pu Hipheia te khan Minister nihna kan kian a ni. Kha kha inremna atana thil pawimawh, sawi hmaih theihloh a ni a. Remna chungchang sawi chuan Pu Lal Thanhawla hming lam thei loh theih a ni lo. Hmanni a Remna Ni hmanna ah khan kan Chief Ministerin khatih laia Chief Minister Pu Lal Thanhawla hming a lam ri lo kha a mak hle a ni.

“Kum 1963 ah MNF a lo piang a, zalenna an sual avangin kum 1966 ah namen lovin kan ram a lo buai ta a ni. Khang hun lai khan Assam District pakhat chauh kan ni a, tunlai a hmasawnna kan sawi hi chu vana rah ang a ni. Mizo mipuite India sipaiin min sawikhawm a, MNF lamin silai an lek bawk a, kan rethei ngawih ngawih a. Chutianga buaina namen lo a thlenna chhan chu Politics buaina a ni a, chu buaina chu chingfel a, Mizoramah remna leh muanna a lo awm theih na turin Congress Party chu kum 1968 ah din a lo ni ta a ni.

“Mizoram Distrct Council ah te, UT kan nih lai khan Mizo Union te, Congress Party leh PC Party ten rorelna an chang chho a. Remna a thlen theih nan hma an la vek a ni. Mahse, remna kha a thleng mai thei lova, boruak kha a ipik em em a ni. Hun a lo kal zel a, 1984 inthlan dawn khan Congress Party chuan inthlan Campaign na-ah Congress an chak anih chuan Remna leh Muanna a awm theih nan second khat pawh inngaihtuah buai lovin lalthutthleng kan kian ang kan ti a, inthlanah pawh kan chak phah ta a ni.

“Kan han sawrkar a, kan beisei leh duh angin inbiakna kha a kal tha thei lova, Pu Denga kha London ah a awm a. Kum 1983 Octoberah Pu Denga chu inbiakna nei turin Indira khan a ko lut a, chutih lai chuan Indira kha kahhlum a ni a, Rajiv Gandhi kha PM a lo ni ta a. Pu Denga te khan, ‘Mizoram sawrkara hotu nihna kan chelh lova, ralthuam hlip veka kan lo haw chuan kan miten an ngai ngam lo’ tiin Sawrkara thuneihna kha an ngiat tlat a. PC sawrkar lai leh Congress sawrkar lai khan, chu chu an thil phut ber a ni. Kha kha, Constitution ah pawh awmlo, thil awlsam tak a lo ni si lova. Pu Thena pawh khan, ‘khua leh tui nih nei lo, thuneihna pek thut kha thil theih a ni lo’ a ti a nih kha.

“Kum 1986 a, MLA term khat pawh la tlin hmaa Minister nih leh MLA nihna te han kalsan kha thil har tak a ni. Tunah hian Kan CM hian a ministry hi re-shuffle dawn sela, a CM nihna hi Pu K Sapdanga hnenah hian thuneihna hlan dawn se a theih ka ring lo. Poilitic ah hian Thangchhuah a awm ngai anih chuan Pu Lal Thanhawla hian thang a chhuah ngei ang. Remna turin lalthutthleng a kian lo, a tawlh hrut chauh a ni, tihte hi thudik lo a ni.

“Remna atan kan hotute khan an thawkrim hle a, tuboh leh dolung inkara awm ang an ni a, thing leh raw innawh laiin, ring rawlh tak meuhin hma an lo la thin a ni. Pu Hawla’n CM nihna a kian dawn khan Central lama kan hotuten mak an ti a ni. Inremna atana lalthutthleng ken hi inpekna vawrtawp atang lo chuan a theih loh a. Kan hotute kha an in hlan a, mellung pawimawh tak an phun a ni.

“He Remna ni champha lawmna hi Pu RL Valla, Vice President, MPCC chuan a kaihruai a, Rev. Dr. Vanlalbela chuan hunserh a hmang a, Pu Lal Thanzara, President, MPCC chuan inlawmna thu a sawiin Pu Lalnunmawia Chuaungo, Sr. Vice President, MPCC chuan Lawmthu sawina a nei. He hunah hian Dr. JV Hluna, Ex MLA leh Pu Vanlalngaia ten thusawina hun an hmang bawk a ni.