Zu leh ruihhlo thuah kohhran hrang hrang thalaite nen kan sawiho tawh

Aizawl | June 5, 2024: Vawiin khan Mizoram Synod bultumin Synod Executive Committee (SEC) member te leh 9th Mizoram Legislative Assembly Member te inkawmna J.M Lloyd Hall, Synod office ah buatsaih a ni a, Chief Minister Pu Lalduhoma pawhin he hun hi a telpui.

Thusawiin CM chuan, kan sawrkar hian kohhran leh tlawmngaipawlte nena thawhhona tha tak neih kan duh a, kan nei chho zel ni pawhin kan hria a, kan lawm hle. Duhsak bik nei lova kala mipui sawrkar neih kan tum a. Eirukna leh hlemhletna titlem turin Project Monitoring Committee chak takin an kal mek bawk. Endik tur a tam avangin hun reilote chhungin kan endik vek seng dawn lova chuvang chuan kohhran pawhin tul in tih hi rawn thlen thin ula a tha hle ang. Zirna lamah hian kohhran nena innghenga kal kan duh a, PPP mode a kal dan tur hi kan dap mek a ni. Ram leilung semrual thuah Progressive Tax system hmanga ven theih a nih kan beisei a, ram pum hi LSC hmanga cover vek a tha kan ti a. Chumi atana thawktu indaih lohna hi outsourcing kan tum dawn a ni. Zu leh ruihhlo thuah kohhran hrang hrang thalaite nen kan sawiho tawh a, Core Committee kan din thar a, a kal dan pawh kan tidanglam hlek a. Rs. 3 Crore hmanga chet lak tan kan tum mek a, hnathawh tichak turin Dan pawh siamrem kan tum a ni, a ti. Heng bakah hian sawrkarin ruahmanna leh hmalakna a neih hrang hrang te Chief Minister hian a tarlang a, 'Mizoramah Pathian ram thlentir kan duh a, kan vei a. Kohhran nen hian project intawm kan ngah em em a ni. Kan ram tan, kan hnam tan leh Chanchintha atan kohhran leh sawrkar hi i thawkho tlat ang u, in tawngtaipuina pawh kan mamawh reng a ni' a ti.

Pu Lalbiakzama, Speaker pawhin thusawiin, Mizoram Synod-in remruatna fel tak neia inkawmna a buatsaih chu lawmawm a tih thu a sawi a. Sawrkar leh ram hmangaihtu kohhran kan nei hi kan vannei a ni.Thurawn kan mamawh a, zilh kan ngaihna a awm a, inzir zel mamawh kan ni, a tulna apiangah inpuitawn zel ang u. Kan zain lokal vek thei ila ka duh em em a, nimahsela kan zingah state pawn lama zin mek te, damsam lo te, programme lo nei lawk tawh te an awm a, thenkhatin an bialah chhiatna an tawh avangin an awmchilh bawk a. Kan rawn inlan kim thei ta lo a ni, a ti.

Synod aiawhin Rev. P.B Mankima, Secretary, Mizoram Synod chuan thu a sawi a. Ram rorelna hi Pathian rawngbawlna pawimawh a nih avangin thawhpui che u kan inpeih reng a. In tan kan tawngtai reng thin.Taksa lama mipuite mamawh thlentute in ni a, keini hi thlarau lama an mamawh enkawlin kan awm a, taksa leh thlarau chu sawi hran theih ni mahse then hran hleih theih loh a ni a. Kan thawhho that a tul niin kan hria a ni, a ti a. Mizoram Synod in sawrkara a thu thlen te a chhiar chhuak a ni. Chungte chu:

1. Hleih nei lova rorel turin

2. Corruption tibo turin

3. Dan hmanga rorelna kengkawh turin

4. Chanchintha leh kan sakhua venhim

5. Kan ram zirna siam tha tura thawhho

6. Ram hmasawnna tura tan la turin,

7. Ram leilung insemrual tura tan la turin,

8. Zu leh ruihhlo tirem tura tan la turin

9. Sumdawnna tha lo tibo tura hma la turin

10. Fa nei tam tura hma la turin

11. Hriselna kawnga nasa lehzuala tan la turin.

12. Thing leh mau leh nungchate humhalh

13. Mizo tawng humhalh tura tanlak, 8th Schedule-a telhtir

14. Ramri chin siam fela humhalh.

15. State dang nena inkalpawhna tha neih

16. Thutiama rinawm turin leh tihhlawhtlin theih loh tur thila mipuite hmaa intiamna nei lo turin, tih te an ni.

He hunah hian Pu B. Lalchhanzova, Minister, Pu Lalchhandama Ralte, MLA leh Pu C. Ngunlianchunga, MLA te pawhin thusawina hun an hmang a ni.

He hun Rev. R. Vanlalnghaka, Moderator, Synod kaihhruaiah hian Rev. C. Zorammawia, Senior Executive Secretary, Mizoram Synod chuan inhmelhriattirna leh kal khawmte lawmna a nei a. Mizoram Synod chuan Mizoram sawrkar inthlanpui neih a nih a, sawrkar thar a pian apiangin Mizoram Synod chuan MLA te leh SEC te inkawmhona a buatsaih thin a. Vawiinah hun duhawm tak kan hmangho thei hi kan lawm hle a ni, tiin he huna tel MLA te hnenah lawmthu a sawi a. SEC hian MLA zawng zawng te hi Holy Bible an pe vek a ni.

Pu Lalfamkima, Deputy Speaker chuan MLA tel thei te hmelhriattirna a nei a. Rev. C. Lalsangliana'n MLA zawng zawng te tana malsawm tawngtaina a hmang a, Rev. V.L Luaia Hranleh, Executive Secretary, Mizoram Synod chuan lawmthu sawiin inkawmna hun a khar a ni.