Champhai-ah World Environment Day pual Rally nei

Champhai | June 5, 2024: Vawiin khan District Education Office, Champhai leh Mizoram Pollution Control Board bultumin Champhaiah 'Boruak thianghlim (Clean Air)' tih thupui thlan hmangin kawng zawh a ni.

World Environment Day Rally hi Champhai Vengsang atanga neih tan niin hemi puala hun tawi, Pu Hrangthantluanga, Office Assistant, DEO Office kaihhruaiah MPCB Co-ordinator Pi F. Lalrintluangi chuan thupui thlan 'Boruak thianghlim' tih a sawifiah a. Mihringte'n boruak thianghlim kan mamawhzia tarlangin, a thlawna kan dawn boruak thianghlim telloin rei tak kan dam thei lo a, hei vang hian boruak thianghlim min petu thing leh mau humhalha phun belh kan uar sauh sauh a ngai a ni, a ti bawk.

Thusawitu dang Pu Lalthlamuana Tochhawng, SDEO Champhai chuan khuarel chhiatna lo thleng hrang hrangte chu kan chhehvela thing leh maute kan humhalh tawk loh vang a ni, a ti a. Kan chhehvela ramngawte kan humhalh that chuan boruak thianghlim kan dawng tha ang a, hriselna tha kan nei dawn a ni, a ti bawk. SDEO chuan luidung nungcha leh tuilakna humhalh that a tul thu sawiin, tuilakna kawrte kan tih thianghlim a ngai a ni tiin, zirlai kalkhawmte chu boruak thianghlim neih theih nana hma la zel turin a chah bawk.

Hun hman zawh hnu hian World Environment Day pualin kawngzawh a ni a. Champhai Vengsang atangin Circuit House thleng kawng zawh a ni a. Circuit House-ah hian Pu H. Lalengzama, Hindi Education Officer, Champhai kaihruaiin kharna hun hman a ni.

World Environment Day pual hian photo booth/ banner hmun thum- Vengsang, Vengthlang leh Bethel kawnahte dah a ni a; thla lakpuitute tan portal-a upload zel tura ruahman a ni.

He hunah hian Education Department Office hrang hranga thawktute, Champhai khawpui chhunga Eco-Club nei School hrang hrang zirlaite leh zirtirtute'n World Environment Day pual hian kawng an zawh a ni.