Nexa MBA Official Championship neih a ni dawn

Mizoram a Badminton inelna ngaihlut hlawh ber leh lian ber, player-te paw'n champion an chak na ber tournament ni bawk, NEXA GIG MOTORS MBA Official Championship 2024 (Junior & Senior) chu June ni 25, 2024 atang khian Ramhlun Indoor Stadium-ah khelh tan a ni dawn ta. 

He tournament hi chi hnih ah then a niin, Junior category bik hi June ni 25-29, 2024 chhungin khelh a ni ang a, Under-11 atanga Under-19 inkar category hrang hrang 16-ah inelna neih a ni ang. Senior Official Championship bik hi July ni 2-6, 2024 chhunga khelh tur a ni ve thung a, category 5, heng- Men's singles, Women's singles,  Men's doubles, Women's doubles leh Mixed doubles-ah te hian inelna neih a ni thung dawn a ni.

MBA Official Championship hi Badminton Association of India (BAI) calendar a lang phak tournament a niin NEXA GIG Motors in an sponsor a, co-sponsor eng emaw zah dang an awm bawk. Junior Championships bik ah hian category hrang hrang 16-ah inelna hmachhawn tura hming pe player 215 an awm a, entry 279 teh meuh lut in, match 280 chuang en tur a awm dawn. Under-15 Boy's singles (BS) ah entry 47 lai awmin, category pakhat a entry luh tamna ber a ni. Entry a tam tham deuh avângin Junior category bik hi hmun hnih ah khelh a ni dawn a, Ramhlun Indoor Stadium bakah Govt. Mizo High School Hall, Chanmari chu a tir lamah hman tel a ni dawn a ni.

Category hrang hranga entry a luh dan:

U-11 Boy's singles: 19

U-13 Boy's singles: 34

U-15 Boy's singles: 47

U-17 Boy's singles: 28

U-19 Boy's singles: 21

U-11 Girl's singles: 15

U-13 Girl's singles: 20

U-15 Girl's singles: 18

U-17 Girl's singles: 8

U-19 Girl's singles: 8

U-13 Boy's doubles: 14

U-15 Boy's doubles: 12

U-17 Boy's doubles: 13

U-19 Boy's Doubles: 12

U-13 Girl's doubles: 6

U-15 Girl's doubles: 8

Enbik tur player-te

Kar kalta a All India Sub-Junior National Ranking Tournament, Hyderabad-a neih a bronze medalist Sainunmawia Sailo, Ramhlun Venglai in category 3-ah inelna a hmachhawn dawn a, junior mai bakah senior category pawh a khel tlang nghal ang. Tin, a u, Saitluangpuia Sailo hi Senior Championship khel turin a rawn haw dawn bawk. Anni unau hi KPGBA-a badminton zir mek, tun dinhmun a Mizo player tha ber te zing ami an ni.

Tin, KPGBA-a inzir mek tho, Malsawmhlua (Mama), Serchhip, National Ranking Tournament-a champion thei leh vawi 4 lai medal lo awrh tawh pawh category 3 ah tho a hmel kan hmu dawn a. BAI in badminton thiam bik te inzirna atana a din National Centre of Excellence, Guwahati a hun puma training nei mek C. Lalramsanga, Durtlang hmel pawh kan hmu dawn bawk. He hmuna in zir mek dang, Lalrempuii, Serchhip pawh official  championship khel turin a rawn haw a, category pakhat mai lo a champion tura rinkai zingah a tel. Anni pahnih tangdun hi North East India Mixed doubles champion lai an ni nghe nghe a ni.

Anni bakah KPGBA a training nei mek, H. Lalrinhlui, Chanmari West leh Zoramthari Renthlei, Champhai Vengthlang te hmel pawh kan hmu dawn a. National level-ah pawh a tha pariat (8) zinga lang phak deuh reng an ni. ITM University Badminton Academy-a inzir mek, Vanlalpekhlua Sailo leh Vanlalhruaia Sailo te unau pawh he tournament lian khel tur hian an rawn haw bawk. Tin, Lalrinkimi, Mission veng, Anup Sridhar Badminton Academy, Bangalore-a traning nei mek pawh he tournament-ah hian a rawn in lan dawn a ni. 

Heng Junior category-a inlan tur player te hi Senior level ah pawh an hmel kan hmu dawn hlawm a. A chunga kan tarlang te bakah TATA Trusts (NEIDA) leh MBA te thawhhona atanga din, Aizawl leh Serchhip-a Regional Intensive Training Centre-a coaching kal mek te an tel vek dawn a, Grassroot Centre kalpui mek na hmun 25 atangin player an rawn in lan nual dawn bawk. 

Hmeichhe lam tan lawmman a pung hret dawn

Women and Child Development, Govt. of Mizoram te, TATA Trusts (NEIDA) te leh MBA te thawhhona hnuai ah hmeichhe lam, tournament-a tel an pun theih nan hma lak a ni a, lawmman a an dawn pawisa fai a pun belh dawn bakah Grassroot Centre ti tha te tan lawmman siam a ni bawk. He thawhhona hi Mission Shakti hnuaia Beti Bachao Beti Padhao (BBBP) programme hnuai ah neih a ni a, Women and Child Development, Govt. of Mizoram in Rs 1,00,000/- tumin, TATA Trusts lamin hemi atan bik hian Rs 55,000/- an thawh bawk. 

TATA Trusts hian 'Girl Child Promotion' hnuaiah programme chi hrang hrang an siam a, chung zinga pakhat chu he thawhhona hi a niin, MBA in pawisa a dawn te hi Grassroot Centre tha, hmeichhe lam tana coaching kalpui tha leh chet thatpui te lawmman atan leh Championship a hmeichhe tel, ti tha te pawisa fai dawn belhchhahna atan hman a ni dawn a ni. 

He tournament hi nitin, a bul atanga a tawp thleng in Mizoram Badminton Association YouTube channel ah en theih in, live in pekchhuah a ni thin dawn a ni.