All India Sub-Junior Ranking Badminton Tournament-ah Mizo che tha

JSK-Chetan Anand Sports Centre, Ameenpur, Miyapur, Hyderabad-a June ni 10-17, 2024 chhunga khelh, Yonex-Sunrise All India Sub-Junior Ranking Badminton Tournament 2024-ah Sainunmawia Sailo, Ramhlun Venglai, Sihphir Badminton Club tana khel chuan Under-17 Mixed Doubles category-ah bronze medal a dawng.

Sainunmawia Sailo hi Ishita Negi nen tangdun in U-17 Mixed Doubles-ah an inlan a, quarter final-ah Sachin A. leh Ananya A. te tangdun chu 21-16, 21-13 in an hneh. Qualifying atanga bul tan in (qualifying ah hian match 3 an khel) Semi final hi an thleng a ni. Semi final-ah hian Manish S.Reddy leh Deepak Raj Aditi-te tangdun chu deciding game-ah 21-19, 19-21, 15-21 in, uiawm takin an hneh zo ta lo.

Tin, U-17 Boy's Doubles category-ah Malsawmhlua (Mama), Serchhip chu a partner nghet sa, Mahendra Kalahasti nen tangdun leh in, quarter final match-ah Gokul K. leh Vishank Surendar te tangdun chu 21-18, 21-12 in, straight set in an hneh a, semi final khel tura an in buatsaih lai mek in an tumpui tur ten Mama partner kum chungchangah complaint an thehlut a. Adhaar card nena an thlunzawm a pa phone no an lo hmang chhunzawm tawh si lo a, verify mai theih a ni lo. Kum chungchang avângin uiawm takin an walk over a, an tumpui turte hi an lo hneh fo tawh te an nih avângin leh, an hmabak leh turah chak ve ve thei tura an indah laiin uiawm takin an tla ta a ni.

Hetiang chiah hian Zoramthari Renthlei, Champhai chuan a partner nen Under-15 Girl's doubles-ah champion lai an vuak thlak hnuin, a partner chu kum chungchangah hek a ni a, adhaar card buaina avang bawkin an verify thei ta lo. Quarter final match turah walk over in an chak ta lo a ni.

Under-17 Boy's Doubles category-ah Sainunmawia Sailo leh Vanlalpekhlua Sailo te chu inkawp in, quarter final an thleng bawk a. An tumpui seeded no 3, Bala Pranay Pragda leh Pranit Somani te tangdun chu 21-18, 21-11 in an hneh ta lo thung.

Zoramthari Renthlei hi Under-15 Girl's Singles category ah khel bawkin round of 32 a in vaw thleng a, Vanlalhruaia Sailo chuan Under-15 Boy's Doubles huang ah round of 16 thlengin, Under-17 Boy's Doubles category ah qualifying atanga tan in round of 32 a thleng thei bawk.

Heng Mizo naupang te hi TATA Trusts, NEIDA, MSSC leh MBA te thawhhona atanga chherchhuah, Kotak Pullela Gopichand Badminton Academy (KPGBA), Hyderabad leh ITM University Badminton Academy, Raipur-a TATA Trusts (NEIDA) sponsor-a awm mek te an ni.

Mizoram Badminton Association chuan kan Mizo naupang, Mizoram hming ti tha tute a chhuang a, dinhmun sang zawk leh hlawhtlinna ropui zawk an chan zel theih nana theihtawp chhuah zel turin duhsakna sang ber a hlan nghal bawk a ni.