Aizawl-ah Eid Namaz an hmang; mipa 2500 vel an pungkhawm

Aizawl | June 17, 2024: Tukin khan Aizawl-ah Muslim Sakhaw hunpui Eid Namaz an hmang a. Tawngtai rual turin mipa 2500 vel an pungkhawm.

Eid puala tawngtai rualna hun hi Aizawl West Joint YMA Field, Vaivakawn-ah an hmang a. He hun hmang tur hian Aizawl khawpui chhung veng hrang hrang atangin Muslim sakhaw vuantu mipa an pungkhawm a ni.

He hunah hian an tan leh an chhungte bakah an sakhaw vawn atan an tawngtai a. Chu mai bakah, Mizoram tan malsawmna an dilsak bawk a ni.

He hunah hian Aizawl Mosque Committee & Muslim Welfare Society, Mizoram General Secretary Md Mamon Majumdar chuan mipui hmaah thu sawiin, kalkhawmte chu ram dan ngaipawimawh tur leh danin a phut angin ILP nei ngei turin a chah a. kalkhawmte chu Central YMA leh an chenna hmuna YMA te a tul anga thawhpui a, an dan zam te zawm turin a chah bawk.

Muslim Welfare Society General Secretary chuan, leimin vanga nunna chante tan an tawngtai thu sawiin, an tawrhpui zia lantirna atan sum thawhkhawmin CM Relief Fund-ah an chhun tur thu a sawi bawk.

Muslim Welfare Society General Secretary Md Mamon Majumdar chuan, he hunah hian mi 2500 vel an punkhawm thu a sawi a. Mizoram mipui chungah hna an pek avangtein lawmthu a sawi bawk a ni.

Muslim sakhaw vuantute pungkhawm hi Aizawla awm leh khawsate an ni a, mi tam tak erawh mahni khaw lamah idd hmang tur hian an haw nia thu dawn a ni.