THILPEK I DAWN I HMANCHHUAH KHA PATHIAN CHAWIMAWINA A NI

_Thil Tidanglam Tura Hrual_

-  Rick Warren 

-  May 21, 2024

“He mi avangin ka pa chu chawimawiin a awm thin, tam taka in rah hian; chutichuan ka zirtirte in ni ang.” (Johana 15:8)

Pathian hnen atanga thilpek i dawn chu mi dang tan i hman chuan Pathian i chawimawi tihna a ni.

Eng hian nge Pathian tihlim? Thenkhat chuan biak ina inkhawm emaw, zai emaw, tawngtai emaw chauh hian Pathian a tihlimin an hre thin. Thudik chu hei hi a ni, Pathianin theihna a pek che mi dang tana i hman hian a hlim thin. Mi dang tana i insawr chhuah hian Pathian chuan, “ka siamchhan ang takin a awma, ka lawm zawng tak a ni,” a ti thin. 

Chariots of Fire tih filma Olympian Eric Liddell a chanchinah khan thil chhinchhiah tlak tak mai a awm a, “Ka tlan hian, Pathian avangin nuam ka ti thin,” a ti. Thenkhat chu Pathianin tlan turin a siam a. Thenkhat erawh chu bike te, car khalh emaw tui chunga tlan tur emaw te’n a siam a ni. An theihna zawnah chuan an tha em em a ni. Pathianin chung ho chu a en a, “A tha lutuk, hetiang tur hian ka siam reng a ni,” a ti. Pathian chawimawi tur hian ‘thlarau lam thil’ tih kher a ngai hran lo a ni. 

Bible chuan, “He mi avangin ka pa chu chawimawiin a awm thin,  tam taka in rah hian; chutichuan ka zirtirte in ni ang,” a ti (Johana 15:8). Thilpek i dawn chu tha taka i hman hian Pathian a tilawm thin. I dawn loh thilpek atang chuan Pathian tihlawm a theih loh a ni. Pathian chuan thil zawng zawngah thiamna emaw, theihna nei turin a beisei lo che a ni. A thilpek che chu hmang turin a ti mai che a ni. 

Bible-a a tobul Greek thumalah chuan ‘lawmna’ leh ‘thilpek’ hi thumal thuhmun a ni. Chu chu ‘khawngaihna’ hi a ni. I thlarau thilpek chu i hmanchhuah chuan, Pathian a tilawm ang a, nang pawh i lawm ang. Pathian chuan, “Ka siamchhan ang takin i thawk a ni,” a ti a. Nang chuan, “Chu chu ka lawm zawng,” tiin i chhang thung a ni.

 

Pathianin a siamchhan ang ngei che a hna i thawk a ni tih i inhriat chuan, Pathian ropuina turin i thawk a ni tih i inhria ang. Chu chu khawvela lawmna nasa tak a ni! Chutiang lawmna chu i la nei lo a nih chuan, Pathian ropuina turin thlarau thilpek i dawn chu haichhuak la, a hmasawn zawngin hmang chhuak ang che.

    

Ngaihtuah zui atan

* Pathianin eng ti turin nge a siam che nia i inhriat?

* Engtin nge Pathian a siam chhan che chu Pathian ropuina turin i hman chhuah ang?

*  I thilpek dawn i hmanchhuah avanga i lawmna kha han sawi teh. Chu chu engtianga lawmna nge ni? 

*[Lettu: Sangpuia]*