MNYF-in CM Lalduhoma dawt sawi hnem lutuk an dem!

Aizawl | May 15, 2024: Nimina Lawngtlai Hnam Runa MNYF Hqrs, Aizawl, MNYF Sub Hqrs, Lunglei, MNYF District Hqrs MADC, LADC leh CADC Office bearers-te Joint Meeting chuan Chief Minister zahawm tak Pu Lalduhoma’n tim miah lova mipui dawt a hrilh fo chu ṭha lo, an ti.

MNYF chuan vawiin khan thuchhuah siamin, CM zahawm tak Pu Lalduhoma hian an Sorkar tirha Press Conference a neihah SASCI sum chu Single Nodal Agency(SNA) ah dah vek tawh angin dawt chiang tak a sawi a. MNYF te'n kan chhui chianin SASCI sum a sawi hi SNA Account-ah ni 8.5.2024 thleng khan dahchhuah a la ni lova. K.Deposit-ah Finance Deptt-in an la kawl tang reng zawk tih hmuhchhuah a ni, an ti.

Tin, Ni 3.5.2024 a CM Office-a a Press Conference neihah kum 2022-23 kuma Rs.40,000 lakh sanction aṭanga Rs.20,000 lakh chu lapse angin a sawi a. Hei pawh hi dawt chiang tak a ni. He Rs.40,000 lakh hi Central Sorkarin a rawn release kim vek a. Hna pawh Rs.40,000 lakh man thawh niin bill pawh pek a ni.

Kum 2023-24 a 2nd instalment sum Rs.23,331 lakh lapse chungchangah pawh dawt sawiin MNF Sorkar tih lapse an ti leh ngawt pek a. He sum lapse-na chhan chu 1st instalment Rs.26,669 lakh chu ZPM Sorkarin Financial Year tawp ni 31.3.2024 pel rawka dan kalha kawl tanga a implementing Agency-a a pekchhuah loh vang a ni. SASCI Guidelines ang chuan sum dawn ni aṭanga ni 10 chhungin Finance Deptt-in 1st Instalment sum hi a hmang/pe chhuak tur an nih laiin ZPM Sorkarin Finance Deptt-a K.Deposit-a an kawl tlat vangin 2nd instalment tur Rs.23,331 lakh chu a rawn chhuak thei lova, a lapse ta a ni zawk.

CM zahawm takin ama tih dik lohah midang puh a ching hi a Mizo lova, hotupa ber tih chi a nilo. SASCI sum ‘dere’ pawh pek chhuah a nih loh lai leh Contractors-te nasa taka tih khawtlaia an hnate cut sak an nih laia sum lapse chhana Implementing Deptt leh Contractors-te puh an ni hian “ZPM sorkar hi mawhphurhna la ngam lo sorkar” a nih zia a tilang chiang hle. Hnathawhna tur sum chengkhat mah pe chhuak si lova midang puhmawh tur a zawng hi chin dan ṭha lo tak, CM dangte tih ngai loh a ni.

MNYF chuan, "Chief Minister dawtsawi fo hi a ṭha lo kan ti a, duhsak takin dawt sawi fo tawh lo turin kan ngen a. Nikum SASCI Part-I 2023-24 1st instalment sum hi a Implementing Deptt-ah pe chhuak nghal turin ZPM sorkar hi kan phut a. An pe chhuak lo a nih chuan MNFY-in a ṭul angin hma kan la ang. SASCI sum an suasam dan hi kan enzui zel dawn a ni." an ti bawk.