Taekwondo Black belt Exam neih a ni

 

Taekwondo Federation of India huaihawtin MATA Hall, Republic Vengthlang-ah Taekwondo Black belt Examination neih a nia. Taekwondo Test hautak subject 8 chu mi 44 ten tha takin an paltlang thei.

 Taekwondo Federation of India mi ruat, Master V.L.Sawma leh Master Joseph Thansanga 5th Dan Black belt ten exam hi an endik a ni. 

Taekwondo Black belt exam beitute hian kar khat chuang Advance Course an zir hnuah Exam hi bei an ni a. Personal interview te, Physical fitness(Hriselna leh theihna) te, Self-defence(Mahni invent dan) te, Basic Technique (Thiamna bik endik) te, Brick Breaking(Brick Sah bun) te, Poomsae (thiam dan) te, Sparring(Fighting skill) te  leh Advance Kicking(Thiamna bik) te hmangin an exam a ni.

Exam beitute hi Black belt 1st degree 34 niin, 2nd Degree  4, 3rd Degree exam beitu mi 6 an awm bawk. Exam zinga mi 17 te chu hmeichhia an niin a naupang ber chu Mary Rolawmsangi Royte, Chite Veng niin kum 10 mi a ni.  

Exam result-a mark tha, Top 5 te hnenah MATA chuan lawmpuina thilpek a pe nghal a. Chungte chu;

1. H. Vanlalfela,  Armed Veng South 90 marks

2. Vanlalmawipuia, Venghnuai, 85 marks

3. Vanlalthlenga, Ramthar North, 83 marks

4. Albert Lalrinfela, Serchhip, 80 marks

5. Michael Lalmawizuala, Ramhlun south, 79 marks

6. Pansy Rampanzeli, Chaltlang, 79 marks

Exam Result hi TFI chuan World Taekwondo Headquarters, Kukkiwon, Seoul, South Korea-ah thawnin a pass zawngte tan World Taekwondo chuan Black belt Degree Certificate a rawn pe ang.  

Taekwondo Federation hian MATA hi kum 2008 atang khan North East exam centre pakhat atan a lo pawm tawh a. Vawi 12 lai exam hi buatsaih a ni tawh nghe nghe a  ni. 

Black Belt exam kharna hi MATA President Dr.Rualkhuma Colney in hman puiin fuihna thu nen a khar a ni.