Pro Volleyball | Hmeichhe League khelh dan tihdanglam a ni

Ather Pro Volleyball League hmeichhe league inkhelah point 15 game hman a ni dawn a, set nga zel an khel ang.

Pro Volleyball vawi sarihnaah hian mipa team ruk leh hmeichhe team nga an inel dawn a; working committee chuan hmeichhe league inkhel hmuhnawm zawka buatsaih a nih theih nan point 15 game tura ruahmanna a siam chu kal tlangpui a ni dawn.

Inkhel apiangah set nga zel khelin point 15 hmu hmasain set an la dawn a, chutih rualin dan pangngai angin lehlam nen point hniha an inthlauh a ngai a, set khat lakah point khat zel an hmu ang.

Semifinal atangin mipa khelh dan point 25 game, set thum la hmasa chak zawk anga kalpui a ni thung dawn a; working committee chuan tun aia nung zawka Mizo hmeichhiate an inkhelh theih nan he ruahmanna hi an siam a, inelna a san phah bakah a hmuhnawm zawk ngei an ring a ni.

Inrinniah mipa leh hmeichhe fixture leh handbook tihchhuah a ni ang.

LPS Arena, Falkland, Aizawlin a vawi khat nan Mizoram volleyball inelna sang ber a thleng dawn a. April 23, thawhlehni zanah tan a ni dawn a, inkhelhna tur chhuat siam fel tawhin nilaini khan volleyball khelh nan an buatsaih.

Arena chhung gallery atanga inkhel en turte tan bucket seat 800 dah fel a nih tawh bakah a chhuat zawlin mi eng emaw zatin an en thei dawn bawk a, fel fai, thianghlim leh changkang zawka thil kalpui tumin hma an la mek.

A nih dan tur taka siam zawh fel a nih hma nikum October leh November khan LPS Arena-ah hlawhtling takin LPS Pro Fight neih a ni tawh a, gallery-ah bucket seat dah a la ni lo va, a hmawrbawkna Title Fight-ah mi 2,000 vel an pung khawm a ni.