SOCIAL MEDIA HMANGA TENAWM TAKA ZPM MP CANDIDATE BEIHNA HI NGAWIHBO PUI A NI LO ANG”

 PRESS STATEMENT OF VANLALSIAMA PACHUAU.

GENERAL SECRETARY, LEGAL DEPARTMENT

ZPM GEN. HQRS AIZAWL

Dt 11.4.2024 (Thursday) dar 2:00 PM @ Party Office

“SOCIAL MEDIA HMANGA TENAWM TAKA ZPM MP CANDIDATE BEIHNA HI NGAWIHBO PUI A NI LO ANG”

 

A hmasa in Press mite kan thu ngaithla tura in lokal avang hian in chungah lawmthu kan sawi hmasa duh a. Kan thu leh hlate pawh hi min puanzar sak turin kan ngen duh nghal bawk che u a ni.

Kan hriat theuh angin, nimin ni 10.04.2024 khan kum 2011 leh 2012 bawr vela MAMCO Deputy Manager (Marketing) Pu Lalremthanga leh MAMCO Consultant nia chhal Mustaqur Rahman, Guwahati ten Contract hna pek chungchanga inbumna case chin fel tawh, hremna pawh pek tawh kaihhnawihah ZPM MP Candidate  sawi luh ve talh tumna David Sailo inti pakhat thuziah chu Social Media (Facebook leh Whatsapp) ah te nasa taka thehdarh a ni a. Tin, ni 10.04.2024 zan vek hian Tuesday Nightmare Youtube Channel chuan tu tute emaw phone a be kualin, an inbiakna record chu thehdarh a nih mai bakah a rinthu tlem belhchhah in, case pawh la kal mek anga sawi zuiin a thehdarh leh bawk a. Hei hi thil thalo tak leh Politics-a DAWT hmanga inbeihna tenawm tak a ni tih hi kan sawi duh a ni.

David Sailo inti leh Tuesday Nightmare Youtuber ten an sawi Case hi ACB Case No. 06 of 2015 niin, S.R. (PCA) No. 04 of 2018 a ni a. He case-ah hian Lalremthanga S/o K. Pahlira Residence of Lunglei, Chanmari leh Mustaqur Rahman, S/o Abdul Rahman, Residence of Guwahati lakah chauh thubuai siam a ni. 

He Case hi chinfel vek tawh niin Pu Lalremthanga hi ni 22.11.2022 khan thiam loh chantir a ni a, Mustaqur Rahman hi ni 6.2.2023-ah thiamloh chantir a ni tawh bawk a, Case hi chinfel tawh niin tihtawp a ni tawh bawk a ni.

Case khat nisi, engvanga thiamloh chantir ni hi inang lo nge tih zawhna kan nei mai thei a, a chhan chu Case ngaihtuah a nih dawn lai vel hian Mustaqur Rahman hi Anticipatory Bail-a chhuah lailawk niin, a tlanbo zui tak avang leh zawn hmuh leh mai a nih loh avangin Mustaqur Rahman thiam loh chantirna hi a tlai ta a ni.

He Case-a Pu Richard Vanlalhmangaiha (Richie-a) Social Media leh Youtuber pakhatin hmel tel hram an tumna chhan an sawi langsar berah chuan Affidavit-ah hming a sign ve tih a ni a. MAMCO lam intiamkamna lehkha kha kan chhiar a nih chuan MAMCO Account-a sum lut ngei tur anga tarlan a ni a. Chumi avang chuan Assistant Manager a nihna angin Pu Richard Vanlalhmangaiha khan a sign ve ngei tur pawh a ni. Amaherawhchu, sum luhna erawh MAMCO lam Account-ah ni lovin, Pu Lalremthanga leh Mustaqur Rahman account lamah a lo lut leh daih a ni tih hi ACB te hian an chhuichhuak leh vek a, pawisa vir vel dan zawng zawng chiang zawk a kan hre duh a nih chuan Court Judgement & Order date 22-11-2022 leh 02-6-2023 ah te hian chiang takin tarlan a ni. Affidavit-a hming sign chungchangah hi chuan Pu Richard Vanlalhmangaiha hi bum tel a ni ve zawk a ni.

He thil kan sawiah hian Pu Richard Vanlalhmangaiha  inhnamhnawih ve ngei ni se chuan a lakah hian case siamsak lohna chhan tur engmah a awm lova. Ruling Party thiltih theihna a nei han ti dawn ila, Case intan hun lai a ruling party chu Congress party an ni a, Thubuai ngaihtuah chhoh hun lai vel hi MNF Party ruling lai niin, thuthlukna siam hun lai pawh hi MNF Party rorel hun lai a ni bawk a ni.

He case-ah hian accused (thil tisual ah puh te chu) a chunga kan tarlan mi pahnih te chiah hi an ni a, Pu Richard Vanlalhmangaiha hi chu Prosecution Witness (someone who gives evidence against the defendant in a criminal trial) (thuhretu) ah a tang zawk nghe nghe a ni.

Tuesday Nighmare Youtube channel-in phone call record a pho chhuah a “an mi bum tam tak zinga pakhat thusawi chu han ngaihthlak sak ta zuai ila” a tiha mipa pakhat thusawiah khan “Richie-a leh Pu Remthanga hi kan hlan thlap zel, an pahnih chiah zelin maw…” tikhan a sawi a. Tuesday Nightmare-i’n mi pakhat a tih hi Pu Tlanghmingthanga ni ngeiin kan hria a, a ni hi MNF ruhkawl niin, mi thenkhat phei chuan Pu Zoramthanga uite tihial in an sawi thin a ni. 

Pu Tlanghmingthanga hi Mission Vengthlang mi hlun ni lovin, mi inluaha khawsa thin niin, tunah chuan in hmunte leiin, a insak pawh a nep vak lo tih thu kan dawng leh zel bawk. A mimal chungchang erawh chu sawichhuak kher lo ila, engemaw chen chu kan hre ve a ni. 

Court Judgement & Order date 02.06.2023 a Para 7-a tarlan a nih dan chuan Kendriya Vidhyalaya Lunglei emaw Champhai a School building sakna tur contract in pek intiam in Rs. 25 Lakh chu Pu Vanenga hian a thianpa Pu Tlanghmingthanga, Mission Vengthlang nen Pu Lalremthanga hi ni 10.03.2012 khan an pe a. Contract hna hi an hmu lo anih chuan thla tin 5% punga pawisa hi pek let an nih tur thu Pu Lalremthanga hian a sawi bawk. Tichuan, ni 23.05.2012-ah Pu Lalremthanga hian Rs. 40 Lakh ngaihtuah/pe turin a ti leh a, Rs. 40 Lakh hi an neih theih loh avangin Rs. 20 Lakh chu Lalhmachhuana Despatch Rider Bank account (Vijay Bank) ah thun niin, Mustaqur Rahman Axis Bank Account-ah Rs. 20 Lakhs chu RTGS hmanga transfer leh nghal a ni. Pu Tlanghmingthanga hian Pu Lalremthanga leh Pu Richard Vanlalhmangaiha te awmdun laia pawisa fai hlan fo thin anga a sawi hi Investigation Report leh Court Judgement atang hian DAWT a sawi chiang hle a ni tih a hmuh theih a ni.

Hetianga Case chinfel tawh, thiam loh chang te pawh hriat chian tawh leh hremna pawh pek tawh an nih laia Case-a tel ve reng reng lo, Politics inbeihna tenawm tak hmanga tih hmingchhiat tumna leh mipui ten duhthlanna fim hmang theilo tura DAWT hmanga inpuhna hi keini ZPM chuan tha lo kan ti hle a. Hetianga case chin fel vek tawh leh Special Court zahawm takin thuthlukna a siam fel tawh laia a ching pawr zawnga thu an lo vaivir kual hi Court zahawmna tihbawrhbanna ah kan ngai, Court rorelna zah lohna ah kan ngai a ni. 

 Press Conference kan neih ah hian kan tawp san mai dawn lova, ZPM Legal Department ten kan bawh zui zel dawn a. Criminal Complaint pawh file zui thuai kan tum a ni. Thu diklo ziak a, vawrhdarhtu leh mipui rilru hruai kawi tuma tawngkam thiam taka thudik lo vawrhdarh anih theih nana theihtawp chhuahtu leh thuhretu der nen inthuruala mipui bum tum leh MP Candidate tih hmingchhiat a, mipui ten an VOTE loh theih nana hmalatu lakah hian thubuai siamsak an nih theih ngei nan kan buaipui mek a, Vote thlak hun a thlen hma ngei hian Case pawh siamsak ngei kan tum a ni.

Thil nihna hrechiang hmasa hauh lova, hre hmasa leh sawi hmasa nih duh avanga hmanhmawh taka ke pen zung zung hi kan sim a hun ta hle in kan hria a, tun hnuah hetianga thu belhchian dawl lo hmanga intih hmingchiatna hi tu chungah mah thleng tawh lo se kan duh a ni. 

Court Judgement & Order Link:  https://aizawl.dcourts.gov.in/case-status-search-by-case-number/ ah hian i lut ang a. 

Court Complex: "Aizawl District Court" ,  Case Type: "Prevention of Corruption Act", Case Number: 4, Year : 2018

.