MBA Awards 2024 sem a ni

Ni 6. 4. 2024 (Inrinni) khan Mizoram Badminton Association chuan season kalta chhunga player che tha te hnen ah MBA Awards 2024 a hlan a. He chawimawina hian trophy bakah pawisa fai leh badminton bungrua chi hrang hrang a keng tel a ni. 

Badminton Inn Player of the Season

MBA Award 2024 hi category 4-ah then a ni a, chungte chu: Badminton Inn Player of the Season (male & female) leh most promising player of the season (male & female) te an ni. Badminton Inn player of the season (mipa) lawmman dawngtu chu H. Lalthazuala s/o H. Zohmangaiha, Chanmari West veng, Ralte Villa Badminton Club player a ni. 

Season kal ta khan Thazuala hi 35th Sub-junior National Championship, Hyderabad-a neih ah Under-17 Boy's Singles category-ah a champion a, All India National Sub-junior Ranking Badminton Tournament, Lucknow-a neih ah U-17 Boy's Singles category-ah vêk hian a champion bawk. Tin, North East Zone Interstate Badminton Championship 2023, Arunachal Pradesh-a neih ah U-19 Boy's Singles inelna huangah Gold medal la in, MBA Official Championship 2023, Senior (Men's singles) leh Junior category (Under-19 Boy's singles) ah te a champion kawp bawk a ni. Heng bakah hian 30th Smt. Krishna Khaitan Memorial All India Junior Ranking Prize Money Badminton Tournament (Under-19), Panchkula, Chandigarh a neih ah silver medal a la bawk. He final hi hliam avangin a khel tluan thei lo nghe nghe. Tin, season kalta khan Thazuala hi U-17 Boy's Singles-ah India aiawh tura thlan niin, Chengdu, China-a Badminton Asia Championship-ah a in lan bawk a ni. 

Hmeichhe lamah Badminton Inn Player of the Season atan Lalrempuii, D/o, Albert Lalrosanga, Serchhip, Ralte Villa Badminton Club tana khel chu thlan a ni a. Lalrempuii hian season kal ta khan North East Zone Interstate Badminton Championship-ah Under-19 Mixed Doubles leh Girl's doubles category-ah te Gold medal a la ve ve a. Tin, North East Games 2024, Dimapur a neih zawh tak ah Mixed Doubles category-ah Gold medal a vaw chhuak bawk. Tin, MBA Inter DBA Championship 2023-ah Ralte Villa BC Senior Mixed Team chu a champion pui bawk a ni. Heng award pahnih te hi Badminton Inn, Chaltlang te chuan an sponsor a, pawisa fai leh trophy an dawn bakah Sunlight Sports dealer-te atangin badminton kit an dawng bawk. 

Most Promising-ah Mama leh Thari

Malsawmhlua, s/o Albert Lalnunhlima, Serchhip hnenah Most Promising Player of the Season (Male) chu hlan a ni a. Mama hi season kalta chhung khan a che tha hle. 2nd Ashwini Gupta Memorial All India Sub-junior Ranking Badminton Tournament 2023, Panchkula, Haryana-a khelh ah Under-15 Boy's Doubles-ah Gold medal a la a, hemi category-ah vek hian All India Sub-junior Ranking Badminton Tournament 2023, Lucknow-a neih ah Silver medal a dawng bawk. Tin, MBA Official Championship 2023 (junior)-ah khan U-15 Boy's Singles leh Boy's Doubles category-ah te a champion ve ve bawk a ni. Kumin August thla hian kum 15 a tling ang, ani pawh hi Ralte Villa Badminton Club player tho a ni. 

Kum 14 chiah a upa, Champhai Vengthlang tleirawl Zoramthari, d/o Rinsangpuii, Ralte Villa Badminton Club tana khel mek chu most promising player (female) atan thlan a ni thung. Ani hian season kalta chhung khan All India Sub-junior National Ranking tournament, Bangalore-a neih ah Under-15 Mixed Doubles category-ah bronze medal a dawng a. The Gaudium Sub -junior Open Tournament, Telengana-a neih ah U-15 Mixed Doubles category-ah vêk hian a champion bawk. Season kalta khan training a neihna lama a chet that avangin Pullela Gopichand Badminton Academy (PGBA)-a awm tura thlan a ni nghe nghe a ni. 

Mizoram Badminton Association chuan MBA Awards 2024 dawngtute a lawmpui a, an hmalam atan hlawhtling tura an in buatsaihna kawng hrang hrangah duhsakna sang ber a hlan nghal bawk.