Aizawl | April 7, 2024: Mizoram chhunga badminton inelna lian ber pawl leh ngaihhlut hlawh tak, Yamaha MBA Inter Club Badminton Team Championship 2024, Dt 1 - 6, April, 2024 chhunga neih chu Inrinni khan zawh fel a ni ta. He tournament-ah hian category 9-ah inelna kalpui a niin, category pahnih a champion kawp thei Mizoram Police Badminton Club chu overall champion an ni.
Yamaha MBA Inter Club-ah hian heng category: Under-15 Boy's & Girl's Team, Under-19 Boy's and Girl's Team, Men's team, Women's Team, 35+ Men's Team, 45+ Men's Team leh 55+ Men's Team-ah te inelna neih a ni a. Club hrang hrang 29 atangin team 88 in lanin, player 300 chuang an tel thei a ni.
MEN'S TEAM CHAMPION BAWNGKAWN
He tournament a ngaihhlut hlawh ber Men's Team final-ah Bawngkawn Badminton Club (BBC) leh Chanmari Shuttlers Club (CSC)-te an in tawng a. Tun dinhmun-ah Mizoram chhunga player nei tha ber ve ve an ni a tih theih awm e. First singles-ah Joseph Lalhruaitluanga, BBC leh C. Lalramzauva, CSC te an inkhel a. Straight set in C. Lalramzauva a chak. Hemi zawh hian Lalrinawma leh Laldintluanga Tlau, BBC te inkawp chuan Subham Yadav leh Steven Lalhriatpuia, CSC-te tangdun chu first doubles deciding game ah an hneh let veleh a, 1-1 a ni. 2nd Singles khelh a ni a, BBC lam atangin Malsawmsanga (Esha) lo pen chhuak in, CSC lam atangin Lalramdinthara a rawn in lan thung. Esha hian straight set in a tumpui a lo hneh veleh thung a, BBC lam in 2-1 in hma an hruai. Chutih laiin reverse doubles-ah C. Lalramzauva leh Joseph VL Ringngheta, CSC-te tangdun chuan Mano Malsawmdawngliana leh Joseph Lalhruaitluanga, BBC-te tangdun chu straight set tho in an hneh leh a, 2-2 a ni. Deciding match pawimawh tak khelh a ngai a, he match khel tur hian BBC lam atangin Laldintluanga Tlau a in lan a, CSC lam atangin Isak Lalmuanawma a rawn chhuak thung. Champion tur zawnna a ni a, point an in nih rual zak zak hnu ah point pawimawh lai ah Dindina rawn che tha zawk in, straight set in a chak a, Bawngkawn Badminton Club a champion pui!
Tin, Women's Team lamah Saron Badminton Club leh Chanmari Shuttlers Club-te an intum a, an in hnehtawk hle. First singles inkhel hmuhnawm takah Ramdinmawii, CSC chuan Laldingpuii, SBC chu deciding game-ah a hneh hram a. Doubles-ah erawh Laldingpuii leh Abigail Lalthazuali, SBC-te tangdun chuan TC Lalthazuali leh Lalngaihsangi, CSC te tangdun an hneh thung. Deciding match khelh leh a ngai a, SBC lam atangin Abigail-i a rawn ding chhuak a, CSC aiawh in Lalngaihsangi a rawn inlan thung. Inhnehtawk taka an khelh hnu ah deciding game-ah SBC lam in chakna changin, champion trophy ngaihhlut hlawh an chawi haw.
OVERALL CHAMPION MIZORAM POLICE
A pumpuia Gold la hnem ber hnenah Overall Champions Trophy hlan a ni a, a dawngtu chu Mizoram Police Badminton Club (MPBC) an ni. He tournament-ah hian Saron Badminton Club chuan category 4-ah final an lut a, champion tura beiseiawm ber an ni. Tin, Chanmari SC pawh category 3-ah final an lut bawk. Chutih laiin, an final luhna a champion ve ve awmchhun MPBC-te overall champion an ni thung. Anni hian 35+ Men's Team-ah leh 45+ Men's Team-ah te Gold medal an la a, Men's team-ah bronze medal an dawng bawk.
JUNIOR CATEGORY-AH AIZAWL PAWN AN CHE THA
Tun tumah hian player tel te leh champion te thlir in Mizoram Badminton hmelhmang a inthlak danglam hle a tih theih. Junior category lamah Aizawl pawn lam an rawn che tha hle a, category 3-ah an champion. Under -15 Girl's team-ah North Kolasib GSA in Saron Badminton Club hnen in Gold medal an hlawh chhuak a. Under-19 Girl's Team-ah pawh Mamit Badminton Club in Saron Badminton Club hneh in, champion nomawi an chawi haw.
Under-19 Boy's Team inelna hmuhnawm takah Serchhip Kawnpui Badminton Club-te chuan Badminton Club Republic an hneh a, Gold medal an vaw chhuak bawk. Under-15 Boy's Team huangah erawh Hlimen Badminton Club-in 08 BC Mamit Team an hneh thung a, Aizawl khawpui chhung atanga Junior category bikah champion thei awmchhun an ni.
Result hrang hrangte:
Under-15 Girl's Team
Champions: North Kolasib GSA
Runner-up: Saron BC
Under-15 Boy's Team
Champions: Hlimen BC
Runner-up: 08 BC Mamit
Under-19 Girl's Team
Champions: Mamit BC
Runner-up: Saron BC
Under-19 Boy's Team
Champions: Serchhip Kawnpui BC
Runner-up: BC Republic
Men's Team:
Champions: Bawngkawn BC
Runner-up: Chanmari SC
Women's Team:
Champion: Saron BC
Runner-up: Chanmari SC
35+ Men's Team:
Champion: Mizoram Police BC
Runner-up: Chanmari SC
45+ Men's Team:
Champion: Mizoram Police BC
Runner-up: Zotlang BC
55+ Men's Team:
Champion: Ramhlun United BC
Runner-up: Saron BC
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: