RINNA I NEIH CHU RING RAWH

_Hmuh Theih Loh Indona_

By Rick Warren 

— March 08, 2024

“Rinna phaw la ula, chu mi chuan mi sual thal alh thei zawng zawng chu in timit thei ang.” Ephesi 6:16

Isua zuitu i nih avang hian misual mei thal chu engtik lai pawhin i lamah a lo kal reng a. Setanan i rilruah heng hi tuh a tum ṭhin:

*Rinhlelhna.* Zawhna i inzawt a, “Pathianin a sawi tak tak em? Pathian ka ring tak tak em? Nangma hrilhfiah dan mai mai a ni lo vem ni?”

*Hnualna.* Setana chuan, "Hma i sawn thei chuang lo. I danglam dawn chuang lo. Tum pawh tun duh suh.”

*Khawtlaina.* Thleng se i tih chu a thleng nghal mai lo va, nangmah leh nangmah inzawtin, “Hei hi engvangin nge a rei em em?”

*Harsatna.* Heti hian i ngaihtuah a, “Engvangin nge hei hi a harsat em em? Engvangin nge kawppui tur hi ka hmuh mai theih loh? Engvangin nge hna hi ka hmuh mai theih loh?”

*Nguina.* Heti hian i inhrilh a, “Hei hian hlutna a nei lo.” Ṭanlak chakna em em pawh i nei hran lo a ni.

Khing mei thal te khi an lo kal reng a. I nunah harsatna an rawn thlen a ni. Harsatna a lo thlen lai chuan — Hnathawh i neihloh lai emaw chhungkua in harsatna in paltlang lai pawhin — heng mei thal te hi an lo thlawk chak zual sauh ang.

Chumi hmachhawn tur chuan i inpeih a ngai!

Bible chuan, “Rinna phaw la ula, chu mi chuan mi sual thal alh thei zawng zawng chu in timit thei ang.” Ephesi 6:16.

Chung mei thal te chu engtin nge i chinfel ang? Rinna phaw la ang che. Chu chuan rinhlehna, hnualna, khawtlaina, harsatna leh nguaina lakah a veng ang che. Khawvela i hmuh, hriat leh ngaihdan chu engpawh ni se Pathianah innghat rawh. Setana mei thal mumallo tak i hmachhawn hun chuan Pathian mumal tak i mamawh tihna a ni.

I rinhlelhna chu ringhlel la, i rinna chu ring rawh le. Mi thenkhat tihdan chu a in kawkalh chiah thung a. An rinhlelhna an ring a an rinna an ringhlel hlauh thung si a ni. Thil atthlak tak a ni! Pathianin a Thu a min hrilh chu pawm mai tur a ni.

Harsatna i hmachhawn hunah chutiang mumal taka chetlakna chu i mamawh a ni. Rinna phaw i lak chuan, i nunah Pathian thutiamte chu thleng diklo ang pawhin lang se, Pathian awmze nei a ni tih i hrethiam ang.

Rinna phaw chu hlip miah lo la. Setanan mei thala a vawm che hi a bang dawn si lo va. Inveng tlat la. I nunah engpawh thleng se, Pathian leh a Thu chu ring tlat rawh.

Ngaihtuah zui atan

* Tunlai hian eng Setana mei thal ber hian nge tibuai che — rinhlelhna, hnualna, khawtlaina, harsatna, emaw nguina?

* Pathian Thu in a sawi avangin eng thil hi nge thleng dik nia i hriat?

* Engtin nge inveng chungin thlarauvah chuan i awm zel theih ang?

*[Lettu: Sangpuia]*