Mizoram Snooker Championship 2024 a hmawr bawk ta; Lalrina Renthlei a champion

Aizawl | March 9, 2024: Mizoram Snooker & Billiards Association (MSBA) buatsaih Mizoram State Snooker Championship 2024 chu zanin khan MSBA Hall, Hawl Indoor Stadium-ah zawhfel a ni ta a, Lalrina Renthlei a champion.

Mizoram State Snooker Championship 2024 final-ah hian Lalrina Renthlei, Tuikhuahtlang leh Lalsangzela, Khatla South te an inkhel a, Lalrina Renthlei-in 4 - 1 in hnehna a chang ta a ni.

Mizoram State Snooker Championship 2024 final hi race to 4-a khelh niin, frame li la hmasa sa chak an ni.

Lalrina Renthlei hi Snooker Ranking-ah Mizoram No. 1 ni mekin, Lalsangzela hi no. 3 a ni mek a ni.

MSBA buatsaih Mizoram State Snooker Championship 2024-ah hian player 29 an tel a, Aizawl khawpui pawn atangin player pahnih an tel a ni.

Mizoram State Snooker Championship 2024 hi March 4, 2024 atang khan tan a ni a, zanin khan zawh a ni ta a ni.

Mizoram Snooker & Billiards Association (MSBA) chuan, Hawla Indoor Stadium Republic Vengthlang-ah hall neiin, Cue Sport lam ngainatute tan theihtawp a chhuah a. Pool leh Snooker-a tuite tan Pathianni tih loh, ni tin chawhnu dar 1:00 atanga zan dar 9:00 chhungin a duh apiang tan inkhelh theih turin kawng zau tak a hawng a. MI pakhat tan ni khatah cheng 50 lekin, a duh apiangte tan MSBA Hall-ah hian Pool emaw Snooker emaw pawh a khelh theih reng a ni.

Pool leh Snooker-ah hian hmeichhia bakah mipa kum naupang lam khel an tam lova, national khelh theihna kawng zau tak a inhawng a, hetiang lama tuite chu Mizoram hming phochhuak turin a penchhuah chur chur theih a ni.