LPS Cup Round of 16 | RAMHLUN SOUTH 5-0 BETHLEHEM

March 7, 2024: Vanlalthlamuana'n goal hnih thunin Ramhlun South-in si nga faiin Bethlehem an hneh a, nilaini zanah Mahindra XUV3OO LPS Cup quarterfinal an lut.

Rajiv Gandhi Stadium, Mualpuiah vawi thum champion tawh Ramhlun South-in fuh takin bul an tan a, minute hnih an inkhelh hmain Lalrohlua Sailo chuan ball vawrh chhuakin captain Lalremruata'n a um fal a, goalkeeper F Lallawmzuala pet khumin a khung a ni.

Bethlehemin an bei let zo lo va, first half tawp dawnah Danny Zorammawia ball pet atangin Thlamuana'n hnai tak atangin kawh takin a chhuih lut a, si hnih faia hmahruai chungin chawlhlawk an hmang.

Darkar khat an inkhel tihin Danny-an Bethlehem beiseina beng hniamin Remruata corner pet a tauh lut a, minute sarih hnuah Remruata siamsak atangin JH Remlala'n a chhuih lut ve leh bawk.

Hun pangngai tawp nan minute ruk a la awm tihin ding lam sir atangin Francis Vanlaldika'n a vawrh a, Thlamuana'n vawi khatah pet lut nghalin Divya Player of the Match lawmman a dawng a, hun tawp thlengin Bethlehemin hlauhawm thamin an nawr zo lo va, round of 16 kal meka tlawm nasa ber ni chungin khelmual an chhuahsan a ni.

Aizawl District Football Association buatsaih inter village football chanchina team hlawhtling ber Ramhlun South-in 2018 hnua a vawi khat nan champion leh tumin hma lam an pan a, inrintawkna nasa zawk nei zui thei turin Bethlehem lakah an inlan a ni.

Bethlehem LC 0-5 Ramhlun South LC

⚽RS : Lalremruata 2' Valalthlamuana 36' 83' Danny Zorammawia 60' JH Remlala 68'

Divya player of the match : Vanlalthlamuana (J No 7, Ramhlun South LC)