LPS Cup Round of 16 | KAWNPUI JOINT 3-1 SALEM VENG

March 7, 2024: Kawnpui Joint-in hun tawp lamah vawi hnih khungin Salem Veng beiseina an titawp a, nilaini zan Mahindra XUV3OO LPS Cup round of 16-ah goal thum goal khatin an chak.

Rajiv Gandhi Stadium, Mualpuiah eng a that tawk loh avangin second half tan dawnah minute 15 chuang inkhel a khailak a, nikum YMA football-a semifinal lut leh mualneitu Salem Veng tlar hnungin hun tawp dawnah an insawrbingna an hloh a, Kawnpui forward Lalkrossmawia'n fuh zeta a tauh luh hnuah Lalrintluanga'n goal ruakah pet lutin hnehna a nemnghet.

Team pahnih player-te inkarah kut thawhin buaina a chhuak zui a, Salem Veng captain Joseph Lalnunpuia hnawhchhuah a nih phah a, Aizawl district pawn atanga sawm bik team pali zinga mi Kawnpui Joint-in coach Malsawmkima hovin quarterfinal an lut a ni.

Inhnehtawk takin an innawr tawn a, darkar khat an inkhel tling tep tawh tihin Robert Lallawmzuala'n Aizawl pawn team mamawh a tihlawhtling a, box chhung chiah atangin goal ban hla lam kilah a pet lut a ni.

Salem Veng insiam tharin a hma aia nung zawkin an khel zui a, minut 83-ah Jessie Lalmawizuala penalty box pawn atangin leihrulin a pet a, hlauhawm lo tura ngaih a nih laiin goalkeeper Lalhruaitluanga'n a nam per a, a bula awm Lalnunzira'n awlsam takin a khung a ni.

Minute hnih hnuah Kawnpuiin hma an hruai nawn leh nghal a, Salemin an lamah ball hlohin an tuar zui a, C Zohmingsanga'n ding lam atanga ball a vawrh chu Krossmawia'n nalh takin a tauh lut a, Aizawl team-in an si phurh sut nawn leh tumin an bei nasa hle a ni.

Hun pangngai tawp hnuah minute 13-na a kal mek tihin Kawnpuiin an bei let thut a, Zohminga ball pet chhuah umin Rintluanga'n a khalh fal a, goalkeeper Zosangliana a tlan hel hnuah awlsam takin a pet lut a, lehlam beiseina titawpin buaina a awm zui a, Salem Veng player leh team hruaituten thinrim takin an lungawi lohna an lantir a ni.

Zirtawpni zanah round of 16 zawh a ni dawn a, vawiin tlai dar 4:30 atangin champion lai Armed Veng leh Durtlang an inkhel a, zanin dar 8 atangin Vaivakawn leh Kulikawnin quarterfinal luh inchuh ve thungin, naktuk tlai dar 4:30-ah Republic Veng lehSihphir Venghlun, zan dar 8-ah Ramhlun North leh Sialhawk an inhmachhawn dawn a ni.

Salem Veng LC 1-3 Kawnpui Jt. VC LC

⚽SL : Lalnunzira 83'

⚽KP : Robert Lallawmzuala 60' Lalkrossmawia 85' Lalrintluanga 103'

Divya player of the match : Robert Lallawmzuala (J No 20, Kawnpui Jt VC)