Mizoram State Pool 9 & 10 Ball C’ship 2024 hmawr bawk a ni ta!

Aizawl | March 30, 2024: Mizoram Snooker & Billiards (MSBA) buatsaih Mizoram State Pool 9 & 10 Ball Championship 2024 chu vawiin tlai khan MSBA Hall, Hawla Indoor Stadium, republic Vengthang-ah a hmawr bawk a ni a, 9 Ball Pool-ah Lalsangzela, Khatla South champion-in, 10 Ball Pool-ah T Laltlansanga, Lunglei Chanmari a champion.

Khuallian leh Pool 10 Ball Champion T Laltlansanga

Mizoram State Pool 9 & 10 Ball Championship 2024 final leh kharna hun hi Govt Aizawl College Principal Lalbiakzuala chuan khuallian niin a hmanpui a. Lawmman semna hun hi MSBA Treasurer K Vanlalruali’n a kaihruai.

Khuallian leh Pool 9 Ball Champion - Lalsangzela

GAC Principal Lalbiakzuala chuan, “Cue sport hi a game a san zia leh thluak hman ngaihna leh thluak sawizawina dik tak a nih zia a tak ka hmu,” a ti a. “Mi nawlpui chunglam chauhin an khelh turah an dah thin a, mahse, tu tan pawh khelh theih a nih zia a takin ka hmu.” a ti.

Khuallian - Lalbiakzuala

Khuallian chuan, "Rilru hrisel loh vanga kan ramin harsatna a tawh mek lai a, thluak hman ngaihna infiamna in kalpui hi kan ram harsatna tam tak sutkiannan a pawimawh," a ti a. “Tun aia nasa hian kan thalaite hian khel se - miin hetianga ngaihtuah tak tak senga a khel a nih chuan ruihhlo tih nan hun a awm lova, ruihtheihthilin a tihbuaina hun a awm lovin ka hria a, kan intihhhmuh a pawimawh hle," a ti a. “Zirlaite zingah pawh nasa leh zualin he game hi kan promote a ngaiin ka hria a. Kan tih theih ve zazwng a nih chuan theihtawp kan chhuah tlang ang," a ti bawk.

Chawhnu dar 2:00-a khelh Pool 10 Ball final-ah hian Lunglei Chanmari tlangval T Laltlansanga leh T Laltanpuia Upper Republic te an inhmachhawn a. T Laltlansanga'n 8 - 5 a hnehna changin, Pool 10 Ball champion a ni. T Laltanpuia hi MSBA General Secretary ni lai a ni.

Tlai dar 4:30-a khelh Pool 9 Ball final-ah hian T Laltlansanga, Lunglei Chanmari leh Lalsangzela, Khatla South te an inhmachhawn a, Lalsangzela’n 8 - 5 in hnehna a chang a, Pool 9 Ball champion a ni.

Mizoram State Pool 9 & 10 Ball Championship 2024 hi March 4 khan tan a ni a, Mizoram hmun hrang hrang atangin Player 50 chuang an tel a ni.

Pool 9 Ball Result: Champion - Lalsangzela, Runner up - T Laltlansanga, Semi Finalist - PB Liansangzuala lerh Lalchhandama

Pool 10 Ball: Champion - T Laltlansanga, Runner up - T Laltanpuia, Semi Finalist - PB Liansangzuala leh Zonuntluanga.

Champion leh runner up te hian trophy, citation leh pawisa fai an dawng a ni.

Mizoram State Pool 9 & 10 Ball Championship 2024 hi MSBA buatsaih niin, Mizoram State Sports Council (MSSC) in an sponsor a, MSBA Hall, Hawla Indoor Stadium, Republic Vengthlang-ah khelh a ni a. Quarter final atangin Explore Mizoram Youtube channel-ah Live a pekchhuah thin a ni.